THILSIAM THU 43 - PATHIAN LEKHABU THIANGTHO (BSI)

Joseph Suapite Benjamin Tawh A Hungkitnau

¹ Tichun, zia gam ah chun kial chu a ke nasa ma ma a.

² Ahi’n, Aigupta gam ah bu a puak to uh kha a nêk zaw phat un, a pau chun a kiang un, “chia kit unla, bu neukhat bêk hang paw kit un,” a ti’n.

³ Judah chun a kiang in, “Zia pa chun, ‘La nau neupen uh la hun pui lo uh chun ka mêl mu pua’n lau,’ a ti ahi;

⁴ ka suapiu hi ka kiang ua la sawl ding chun, bu hun chawk piak ing ka tiu in;

⁵ la hun sawl lo ding chun vang chia pua’ng kau: Zia pa chun ka kiang ua, ‘La nau uh la hun pui lo uh chun ka mêl mu pua’n lau,’ a ti ngal in,” ti’n a dawnhu a.

⁶ Israel chun, “Bang ziak ah nau dang la nei uh nasan la hil ua, kei â ding ah phalo tak hun gen la hiu em?” a ti’n.

⁷ Amau chun, “Zia pa chun, ‘La pau a dam nalai em? Suapi dang la nei awm?’ ti’n ka chanchin uh leh I Inkuan chanchin uh ei dot ziak ah, zia thu ei dot dungzui ah chu ka gen mai uh ahi: ‘La nau uh chu hun pui un,’ ti’n ah ti chu kua’n he khel khel ngal lo,” a tiu a.

⁸ Chun, Judah chun a pa Israel kiang ah chun, “Nau chu ka kiang un hungsak mai in; tichun, kipan ing ka tiu in, chia mai ‘kau: kei uh tawh, nang tawh, I nausenteu hi thilo ah, I dam theina ding un.

⁹ A chungchâng thu ah hin keima’n a mawpaw pek mai ka; keima ngei ama chung ah hin mawpua’n ei ngai inla: ama chu la kiang ka hun pui tung kît lo ah, la ma ka dinsak kît lo chun, a maw chu kumkhua’n paw mai ing ka.

¹⁰ Khawdâng sawt lo hileng uh, tu’hin a niveinale hung tung kit hial ta ding ka hiu ah,” ti’n a dawnhu a.

¹¹ Ziaphatchun, a pau Israel chun a kiang un, “Chuti ahi ding leh, zia gual hin hiu in: La dip ua khan zia gam ah thilpha khenkhat: thingnâi damdawite, khuaizute, gimtuite, murrate, theihawngte leh vaimakhate neucha chiat in ziapa kiang ah chu kipak thu genna dingin puak piak unla.

¹² Chuleh, dangka le a le’ni keng un. La dip ua paisa um khale paw kit chiat unla; a la mu khial khâk pal uh le himaithei ahiziak in.

¹³ La nau uh chule pui unla, zia pa kiang ah chun chia kit mai un;

¹⁴ Benjamin tawh la suapiu khat hile a hun thâdok theina dingin, zia pa chu El Shaddai in ngilneina pia ta hen. Keima ka hileh chu ka chate ka chân leh ka chân himai ta hen,” a ti tai.

¹⁵ Chutichun, amau in kipakman dingte chu chawi in, dangka le a le’ni kenbe in, Benjamin le a pui tau a. Aigupta gam lam in a chia kit tau a; Joseph ma-âng in a ding kit tau hi.

¹⁶ Joseph in a kiang ua Benjamin um chu a mu phât in, a In enkoltu kiang in, “Ziate saw In sung ah pui lût inla, sa that in, nêk ding siam inla, sûn leh ka kiang ah an ne ding a hiu,” a ti’n.

¹⁷ Joseph thupiak gual ah chun a bawl ta’n; amau chu Joseph In sung ah chun a pui lût a.

¹⁸ Joseph In sung ah a pui lût phat un a lau ma mau ah; “I chia masak chung ua I dip ua dangka ei siam piak kît ziak ua khan ei hiti bawl uh hiding a hita hilam: I chung ua lemchâng hawl ah ei sawisa’n, eimau tawh I sabiltungteu hitawh suak ah ei man ding a hiu hilam,” a kitiu a.

¹⁹ Joseph In enkoltu chu a vanai ua, kotkhak bul ah chun a vaho ua:

²⁰ “Aw he pu, ka hung masak chung ua khan bu chaw ding bep ah hung ka hiu a:

²¹ Ahi’n, giabuk ka tun ua, ka dipteu chu ka hon ua leh en in, ka dangkau chu a dip in a jat ngai ma a la um chiat in: Tu’n ka dangkau chu ka hun paw kit uh ahi.

²² Chuleh, bu chawkna dingin dangka dang le ka hun paw kit ui; ka dangkau chu ka dip ua kua’n a la koi ahi la ka hepuau in,” a tiu a.

²³ Ama chun, “Thamuang tak in um unla lau kiu in: Pathian, la pau Pathian chun la dip ua chu a go a hun piak la hiu chulam: La dangkau kha a kim in ka la mu nai,” a ti’n. Chun, Simeon chu a kiang un a hun puidaw piak tai.

²⁴ Amau chu Joseph In ah chun a pui lût ah, a keng silna ding uh tui le a pia’n; a sabiltungteu chu an a piak sung ah chun,

²⁵ kipakman a puakteu kha Joseph an ne’ a hung masang in a la siam tup diam un: zia’ chu an ne ding a hiu ti a he ta’ngal un.

²⁶ Joseph In ah a hung phat chun, a kipakman hun puakteu chu In sung ah a kiang in a chawi lut un, leitual si’n chibai a bûk chiat tau a.

²⁷ A chanchin uh a dong ah, “La pau a chanchin la gen uh têksepu chu a pha jel na em? Dam in a um nalai nam?” a ti’n.

²⁸ Amau chun, “Ka pau, la suak chu hing leh dam in a um nai,” a tiu a. Chun, a luu kûn in chibai a bûk kit ua.

²⁹ Ama chu a hung dakdok ah, a nau Benjamin, a nu chapa chu a mu’n, “Zia kha la nau neupen uh, a chanchin la gen uh kha a hem?” a ti’n. “Ka chapa, Pathian in hepi ta hen,” a ti nalai a.

³⁰ Chun, Joseph in a nau a mu phât ah chun a thasiat ma ma tâk ziakin, kapdok ding a hung kisa ta’n. A pindan ah lût in, zia tak ah chun a vakap tai.

³¹ A mai a phiat ah, a hung pawtdok kit ah, a kisûm ham ham ah, “Ankuang siam un,” a ti’n.

³² Ama â ding a kithuk in, amau inle amau â ding chiat a kithuk un, a kiang ua Aigupta mite chunle amau â ding chiat a kithuk un; Aigupta mite tawh Hebrai mite’n an nêk khawm chu Aigupta mite â ding ah ten um tak ahiziak in a ne’khawm ngai puau a.

³³ A upa pen ah kipat a chapang pen tiang in, a upat dungzui un Joseph âng in a kitiansak ah; a ki-entuau ah, mak a sa ma mau a.

³⁴ Joseph dawkân ah kipat chun an nêk dingte chu a hawm jak un; Benjamin chanvo chu a dang cheng â sâng in ale’ nga’n a tam zawi. Tichun, uain a dawn ua, ama tawh lim tak in a kipawl khawm tau hi.