THILSIAM THU 41 - PATHIAN LEKHABU THIANGTHO (BSI)

Joseph in Pharaoh Mang Hilchian

¹ Kum ni veng veng nung in, Pharaoh chun a mang lam in, Nail luipi gei ah hin a la ding a.

² Nail luipi ah kipat chun, bawngpi hoi leh thau tak tak pasagi a hung pawtdok ua, phâikhûl lak ah chun a ta tau a.

³ Ziazaw chun, bawngpi gawng chin chen leh gêp lik lek pasagi dang, Nail luipi’ kipat chun a hung pawtdok kit un; Nail luipi gei ah bawngpi dangte kiang ah chun a hung ding tau a.

⁴ Bawngpi gawng chin chen leh gep lik lekte chun, bawngpi hawi tak tak leh thau tak tak pasagite chu a ne zo ziang tau a. Chun, Pharaoh chu a hung khanglo ta’n.

⁵ Ziazaw chun, a ipmu kit ah; mang a nei kit ah: bukung pakhat ah hin vui pasagi lian tak tak leh pha tak tak a hung pawtdok un.

⁶ Chuleh, zia nung ah chun vui sagi dang neucha cha, ngat chin chen, sualam hui in a mût keu sit siat a hung pawt kit un.

⁷ Aleh, buvui ngat chin chente chun buvui lian tak tak, pha tak takte chu a val zo ziang tau a. Pharaoh chu a hung khanglo kit ta’n: a mang a la hita mai hi.

⁸ Jingkal a hung hiphat in, a lungthim chu a buai ma ma ziang ta’n. Tichun, Aigupta gam ah mipil zosia leh dawithiam zosia chu ko khawm dingin mi a sawl ta’n. Pharaoh in a kiang un a mang chu a hil ah; himaleh, Pharaoh mang hilchian piak thei pakhat chale a um puau hi.

⁹ Ziaphatchun, uain pia hotupa chun Pharaoh kiang in, “Tu’ni hin ka thil hi’khial dan ka hedok hi:

¹⁰ Pharaoh a suakte chung ah a lungnat lai khan, vêngtu lian pen etkolna suangkul ah vaithum siam hotu pen tawh ka la um khawm un:

¹¹ Ka paniu in jan khat thu in umzia nei tak mang ka nei gêl un:

¹² Zia tak ah chun, ka kiang in mi vêngte hotupa, Hebrai mi, tangval pakhat a um ah. A kiang ah ka mang uh ka gen phat un, ama chun ka mangteu chu a hilchian ah, ka mang gual un ei hilchian piak gêl a.

¹³ A hilchian gual gual in a hung um ta mai a: Kei chu ka nasep hi ei sepsak kit ah, ama chu a khailum ta ahi,” a tia.

¹⁴ Ziaphatchun, Pharaoh chun Joseph chu a vakosak ngal ah; kin-gang tak in suangkul ah kipat chun a puidok tau a. Ama le a kimetnâm ah, a puansil a theng ah, Pharaoh kiang in a lût ta’n.

¹⁵ Pharaoh in Joseph kiang in, “Mang ka nei in, a hilchian thei kuama a um puau a. Nang in mang chu a thu la het chun la hilchian thei hi ti la chanchin mi gen ka la hia’i,” a tia.

¹⁶ Joseph in Pharaoh a dawnhu ah, “Zia chu keima theina ahi puai; Pathian in Pharaoh chu a duthusam gual tak in dawnhu zaw’n a,” ti’n a dawnhu a.

¹⁷ Pharaoh chun Joseph kiang in, “Ka mang lam in, Nail luipi gei in ka la ding ah:

¹⁸ Chuleh, bawngpi pasagi, hoi tak tak leh thau tak tak, Nail luipi’ kipat in a hung pawtdok un, phâikhûl lak in a ta tau a.

¹⁹ Ziaphatchun, bawngpi dang, pasagi gawng chin chen, mêlsia ma ma, gêp lik lek, zia gual ah mêlsia chu Aigupta gam ah ka la mu ngai lo a hung pawtdok un.

²⁰ Tichun, bawngpi gawng tak tak, gêp lik lekte chun bawngpi pasagi, thau tak tak hung pawtdok masate kha a hun ne zo ta mai un;

²¹ ahi’n, a nêk zaw nung unle a ne’u ti him him a kihe diak lo hial ziang in: A lim ah gual tho khan a gêp lik lek zing ua. Ziaphatchun ka hung khanglo ta’n.

²² Chuleh, ka vak i-mut kît leh, mang ka nei kit ngal ah, ka mang ah chun: Bu kung pakhat ah hin buvui pasagi, lian tak tak, pha tak tak a hung pawtdok un:

²³ Zia nung ah chun, buvui pasagi, giau sit siat, ngat chin chen, sualam hui in a mût geu sit siat a hung pawtdok kit in;

²⁴ ahileh, buvui ngat sil selte chun buvui pasagi, pha tak takte chu a val zo ta mai un: ahi’n, dawithiamte chu ka hil in, himaleh, ei hilchian piak thei kuama a um puau hi,” a ti tai.

²⁵ Ziaphatchun, Joseph in Pharaoh kiang in, “Pharaoh mang teni chu a kibang a hiu: Pathian in a thilbawl dingte chu Pharaoh kiang in a hiatsak ahi chu:

²⁶ Bawngpi pasagi, thau tak takte chu kum sagi a hiu ah; buvui pha tak tak pasagi la mute chule kum sagi ma a hiu: la mang chu a kibang a hiu.

²⁷ Chuleh, a nung ah bawngpi pasagi, gawng chin chen, gêp lik lek hung pawtte chule kum sagi a hiu ah; buvui pasagi, a si ngen hiziang, sualam hui in a mût geu sit siatte chu tawh kibang tho ahi. Ziate chu kial hun kum sagi hung tung dingte chu ahi.

²⁸ Zia chu ahi Pharaoh kiangah: Pathian in a thilbawl dingte chu Pharaoh kiang in a hil ta ahi chu,” ka ti kha.

²⁹ Aigupta gam pumpi ah hin kum phat hun, kum sagi hung tung ding ahi.

³⁰ Zia nung ah chun kial hun, kum sagi ma hung tung kit intin, kum phat hun sung kumte kha Aigupta gam ah hin hetmil veng veng hung hi ta’n a: Kial chun gam hi ne zo vek ding ahi ngal in.

³¹ Hausakna hun kha a zuitu kial ziak ah chun, zia gam ah te hinle he’pha ta pua’n au; kial chu nasa ma ma ding ahi ngal in.

³² Chun, mang thua a hun nei sakna ziak chu, zia thil hung tung ding chu Pathian in a guat ma ma, Pathian ma ma in a hun tunsak kawm ding a hiziak ahi.

³³ Chutichun, tu’hin Pharaoh in mifel tak pakhat, pil tak mai hawldok hen la, Aigupta gam ah hin hotu’n siam hen la;

³⁴ Pharaoh chun, gam chung ah hin hotu dingte guat hen la, kum phat hun, kum sagi sung ah hin Aigupta gam ah bu zosia hi mun nga ah khen a mun khat chiat dawl khawm hen.

³⁵ Chutichun, ama chun zia kum pha hung tun ding sung ah chun bu zosia chu lakhawm in, Pharaoh thunuai ah um dingin khawpi ah te chun sung khawm hen la, koitup hen.

³⁶ Tichun, kial ziak ah gam hi a manthailona ding in, bu chu kial hun sung kum sagi, Aigupta gam ah hung tung ding ah chun kigin lawkna ding ah koitup ding hihen, ti’n a dawnhu a.

Vaihawm Ding Ah Joseph Kaisânna

³⁷ Bawl ding dan a gente chu Pharaoh leh a suakte zosia chun lem a sa ma mau a.

³⁸ Pharaoh chun, a suakte kiang in, “Zia gual ah Pathian thagau umna hi mi dang mu zo ding I hiu em?” a ti’n.

³⁹ Pharaoh ma ma chun Joseph kiang in, “Pathian in zia zosia chu a hun hetsak ziakin, nangma gual ah hethiam leh mipil a um puai;

⁴⁰ nang hi ka lal In sung ah hotu hi’n la tin; ka mipi zosia hi la thu thu’n um uh hen la: lalchutpha ah chut thu bep ah hin nangma sâng in lal ing ka,” a ti tai.

⁴¹ Pharaoh ma ma chun, Joseph kiang in, “Entia, Aigupta gam zosia chung ah hotu’n ka hun siam ta la hi,” a ti’n.

⁴² Pharaoh chun a khut ah kipat a min namna khutsebi chu a jukdok ah, Joseph khut in a bûsak ah: Chuleh, puanmalngat in a thuam ah, a ngawng ah sana khi a awsak tai.

⁴³ Chun, a kângtalai pani’na chun a chuansak a: A ma-âng ah chun, “Khupdin un, Khupdin un,” ti’n a kiko pek un. Tichun, Aigupta gam pumpi hotu’n a siam tai.

⁴⁴ Zia ban ah chun, Pharaoh in Joseph kiang in, “Kei Pharaoh ka hi’n, nangma thulo in Aigupta gam sung ah hin kuama’n a khut leh keng lek thei pua’n au,” a ti’n.

⁴⁵ Pharaoh chun Joseph min dingin Zaphenath-Paneah a sak in; On khua thiampu Potiphera chanu Asenath chu tawh a kichensak ta’n. Tichun, Joseph in Aigupta gam pumpi chung ah thuneina chu a chang tai.

⁴⁶ Aigupta lengpa nasem ding ah a lût kum ah chun Joseph chu kum sawmthum mi ahi ta’n. Chuleh, Joseph chu Pharaoh ma-âng ah kipat in a pawtdok ah, Aigupta gam chu a chuan suak tai.

⁴⁷ Kum phat hun, kum sagi sung ah chun lei chun ga tam tak a sua in.

⁴⁸ Aigupta gam ah kum phat hun kum sagi sung ah bu zosia chu a dawl khawm ah, khawpi sung ah chun bu a sung khawm ta’n: Khaw tin ah chun a kîmvêl ah lou ah bute chu a sung khawm pek a.

⁴⁹ Tichun, Joseph in bu tam tak, tuisuagiat piaunêl jat hial in a sung khawm gei gui mai in, te’ sên le ahi tâk lo ziakin, a te’ se se ta puai.

⁵⁰ Chun, kial tunma chun Joseph in chapa pani a nei ah, ziate chu On khua thiampu Potiphera chanu Asenath in a hinpiakte chu a hiu a.

⁵¹ Joseph in a chapa upa zaw min chu Manasseh a sak in: “Pathian in ka sepgimna zosia leh ka pa chanaute zosia ei hetmilsak ta’ngal in,” a ti ziakin.

⁵² A chapa neuzaw min chu Ephraim a sak ah: “Pathian in ka vangsiatna gam ah hin chi ei suan piak ta hen,” a ti ziak ahi.

⁵³ Kum phat hun sung, kum sagi Aigupta gam ah hung tung chu a hung bei ta’n;

⁵⁴ kial hun, kum sagi ding chu, Joseph gen gual ngei khan a hung tung pan ta’n. Gam tin ah kial a hung ke tai; Aigupta gam zosia ah chun vang nêk ding a um hi.

⁵⁵ Aigupta gam sung pumpi chu a hung kial phat un, Pharaoh kiang ah nêk ding don in a kiko tau a. Pharaoh chun Aigupta mi zosia kiang ah chun, “Joseph kiang ah chiau inla, a gen tapo bawl mai un,” a ti tai.

⁵⁶ Lei chung zosia ah chun kial a kiak tâk ziakin, bu sunkhawmna In zosia chu a hong ah, Aigupta mite kiang ah chun a zuak ta’n; Aigupta gam ah chun kial a nasa ma ma ngal a.

⁵⁷ Zia bep chule hilo in, lei chung zosia ah kial a nasat ziakin, gam tin ah mite chu pûksui dingin Aigupta gam ah, Joseph kiang in a hung sek ui.