THILSIAM THU 39 - PATHIAN LEKHABU THIANGTHO (BSI)

Joseph Tawh Potiphar Ji

¹ Ziaphatchun, Joseph chu Aigupta gam in a pui tau ah; Pharaoh nuai ah mivêng pawl lakah hotu, Aigupta mi Potiphar chun zia tak ah hun pui suk Ishmaelte khut ah kipat chun a la chaw ta’n.

² Lalpa chu Joseph kiang in a um zing ah; ama chu mi lawting tak a hung hi’n: chun a pu Aigupta mi In ah chun a um tai.

³ Lalpa chu a kiang in a um zing ah; a thil hi taphot ah a lawtinsak hi ti a pu chunle a he tai.

⁴ Tichun, Joseph in a pu hepina a chang ah, a na chu a sêm sek ah. Ama chunle a Inkuante chung ah hotu’n a siam ta’n. A nei zosia chu a khut in a koi tai.

⁵ A In enkol hotu’n a siam ah, a nei zosia chung ah thunei ah a siam ni’ kipat chun, Joseph ziakin Lalpa’n Aigupta mi chu a maljawl ta’n: In lam leh lou lam in a nei zosia chu Lalpa’n a maljawl tai.

⁶ Tichun, a nei zosia Joseph khut in a koitha ta’n; a kiang ah thil um him him chu a hetpi ta pua’n, ama an nêk ding bep tilo ngal chu hetphâk a nei ta puai. Joseph chu mi pian pha tak leh mêlpha ma ma ahi.

⁷ Zia nung sawt lo ah chun, a pu ji chun Joseph a hun dawicha ta’n: “Ei luppi in,” ti’n a jawl ta’n.

⁸ Himaleh, ama chu a nuam lo hial ah, a pu ji kiang ah chun, “En in, ka pu’n zia In sung ah hin ka kiang ah bang bang a um em tile a he’pha ta pua’n, a nei zosia ka khut in a koi tai.

⁹ Zia In ah hin kei sâng ah lian zaw kuama a um pua’n; a ji la hiziak in nangma bep lo ngal chu kei â ding ah phal lo a nei puai. Bang ziakin em zia tawhbang gitlona huaisia chu ka bawl ah, Pathian chung ah thil ka hi’khial mai ding?” ti’n a dawnhu a.

¹⁰ Nisi’n in Joseph chu jawl maleh, ama luppi ding a hem, a kiang ah um ding a hem chule a nuam him him puai.

¹¹ Zia hun lai vêl ah chun, ni khat chu a na sêm ding ah In sung a valut phatin, In sung ah chun kuama dang le a um puau a;

¹² a pi chun, “Ei luppi in,” ti’n a puan in a la man ta’n. Ama’nle a puan chu a khut ah nusia in a taidok ta’n.

¹³ Chuleh, a puan chu a khut ah nusia in a taidok theng tai ti a het phat in,

¹⁴ a Inkuanpiteu chu a kodok ah, a kiang un, “En tiam un, ei hi’mualpho dingin Hebrai mi pakhat ka kiang un ka pawsal in a hun pui lût tâk hi! Ei hi’mualpho gua’n ka kiang in a hung lut ah, ngai tak in ka kiko jak ta ahi.

¹⁵ Ka kiko git a het phat in, ka kiang ah a puansil nusia in a taidok tai,” a ti’n.

¹⁶ Chuleh, a pu a hung tun masia a puan chu a kiang in a la koi zing a;

¹⁷ a pawsal kiang in a chanchin zosia a gen ah, “Hebrai mi suak ah la hun pui khan, ei hi’mualpho ding gua’n ka kiang in a hung lut ah;

¹⁸ ahi’n, ka la kiko jak phatin a puan nusia in a taidok hi,” a ti tai.

¹⁹ Chun, Joseph pu chun a ji’n a kiang ah, “Zia la suakpa hin hiti gual ah hin ei bawl hi,” a ti thu chu a het in a lungna ma ma ta’n.

²⁰ Joseph chu a pu’n a pui ah, suangkul ah lal in mi a gawtte koikhawmna lam ah chun a khum ta’n; tichun, suangkul ah chun a um den tai.

²¹ Himaleh, Lalpa chu Joseph kiang in a um pek ah, a chung in a ngilnei ah; suangkul vêngpa hepina a donsak hi.

²² Suangkul vengpa chun suangkul ngâk zosia chu Joseph khut in a vopsak sik sek ta’n. Thilbawl ding zosia chu Joseph khut in a koi tai.

²³ Lalpa chu Joseph kiang in a um ah, a thil hi’ tapo chu Lalpa’n a lawtinsak ziakin, suangkul vêngpa chun a khut ah thil um tapo chu a en se se ta puai.