THILSIAM THU 38 - PATHIAN LEKHABU THIANGTHO (BSI)

Judah Tawh Tamar Thu

¹ Zia lai ah chun, Judah chu a suapite lakah kipat in a pawtdok ah, Adullam mi pakhat a min Hirah chu a vabêl ta’n.

² Judah chun zia tak ah chun, Kanaan mite chanu pakhat a min Shua a vamu’n; ama chu a kichenpi ah, a giakpi tai.

³ A ji chun nau a hun vop ta’n, chapa a hun nei ta’n, a min in Er a sak tai.

⁴ Nau a hun vop kit ah, chapa a hun nei kit ah; a nu chun a min in Onan a sak a.

⁵ Chapa a hun nei kit ngen in, a min in Shelah a sak in; zia lai ah chun a nu chu Chezib khua chêng ahi.

⁶ Judah chun a chatîl Er chu ji a neisak in, a ji min chu Tamar ahi.

⁷ Judah chatîl Er chu Lalpa mit mu in migilo ahiziak in, Lalpa’n ama chu a that tai.

⁸ Judah chun Onan kiang in, “La u ji luppi inla, ama â dingin chi la suan piak ding ahi,” a ti’n.

⁹ Himaleh, Onan chun a chisuan ding chu ama â hilo ding ahi ti a het ziakin, a u ji chu a luppi phat si’n leh a u â ding ah chi a suan piak lona dingin a chi chu leitual in a luan thâk sak sek a.

¹⁰ A thil hi’dan chu Lalpa mit mu ah huat um tak ahiziak in, ama chule a that tai.

¹¹ Judah chun a monu Tamar kiang in, “Ka chapa Shelah hi a pitin masang sia la pa In lam in meithâi in a la um ta di in,” a ti’n; a u te gual in ama le thi kit kha’n ah a ti ziak ahi’n. Tichun, Tamar chu a pa In lam ah um dingin a chia kit tai.

¹² Chomkhat zaw ah chun, Shua chanu Judah ji chu a hung thi ta’n; Judah lusûn hun a hung bei phatin, Timnah khua lam ah a belam mulmêtte kiang in, a lawipa Adullam mi Hirah chu tawh a vachia tau a.

¹³ “La talpupa belam mul mêt dingin Timnah khua lam in a hung hi,” ti Tamar kiang in a hil phat un;

¹⁴ a meithâi puan chu liptha’n, mai khû’na puan in a kikhû ah, Timnah khua lampi Enaim khua lutna ding ah chun a la kichu tai. Shelah chu a piting ta’n; himaleh, ama chu ji’n a neisak nop lo ahi ti a he ngal in.

¹⁵ Chun, Judah in ama chu a mu phât in, nawchizuak hiding in a gingcha’n; a mai puan ah kikhû ahiziak in.

¹⁶ Lam pâm ah numei chu a zuan ah, a kiang in, “Hung in, lungsiat in lumkhawm hi ti,” a ti’n. A monu kha ahi lam a hepaw ngal ah. Ama chun, “Lei luppi man dingin bang lei pia diam?” ti’n a dong a.

¹⁷ Ama chun, “Ganhon lak ah kêlno pakhat hun thot ing ka,” a tia. Ama’n, “Zia chu lei hun thot masang ah ka la kol dingin bang lei pia diam?” a ti’n.

¹⁸ Ama chun, “La la kol dingin bang hun pia ding ka hem?” a ti’n. Ama chun, “La min namna tawh, la ngawng aw tawh, la khut ah um la tiangkhut kha hileh,” a ti’n. Ama’nle ziate chu a pia ngal ta’n, a luppi tai; ama chu tawh nau a hun vop tai.

¹⁹ Ziaphatchun, a thodok ah, a chia mang ta’n; a mai khûna puan a liptha’n, meithâi puan a sil kit tai.

²⁰ Judah in a thil hênte chu la dingin a lawipa Adullam mi khut ah chun kêlno chu a thot ah; himaleh, ama chun a vamu zo ta puai.

²¹ Numei umna mun ah mite kiang ah chun, “Enaim khua lutna ding lam pâm ah nawchizuak kha khoi ah um a tam?” ti’n a dong a. Amau chun, “Zia tak ah hin nawchizuak him him a um puai,” a tiu a.

²² Judah kiang ah chun a hung kit ah, a kiang in, “Ama chu ka vamu zo ta puai; a mun ah mite chunle, ‘Zia tak ah hin nawchizuak him him a um puai,’ a tiu,” a ti’n.

²³ Judah chun, “Nei den mai ta hen; chutilochun, mualpho kha’i ti; zia kêlno hi ka thot in, ama la la va mu zo paw’ngal in,” a tia.

²⁴ Tha thum zaw vêl ah chun mite chun Judah kiang in, “La monu Tamar in nawchi a zuak hen, zia bep chule hilo in jaucha a pâi tai,” ti a hil tau ah. Judah chun, “Hun puidok un, hâl lup ding ahi chu,” a ti’n.

²⁵ A hun puidaw phat un, “Zia thil neipa hin ei gâisak ahi,” ti’n a talpupa kiang in mi a sawl ta’n. Ama chun, “Lungsiat in zia min namna tawh, ngawng aw tawh, tiangkhut hi kua â ahi em enchian phot tiam in,” ti’n a gen a.

²⁶ Judah chun zia thilte chu ama â ahi ti a he ngal ah; zia phat ah chun, “Ama chu keima sâng in a dik zawi: ka chapa Shelah hi ka neisak nuam ta pua hen,” a ti tai. Chuleh, Judah chun ama chu a pawl kit ta puai.

²⁷ Chuleh, a nau nei ding hun a tun phatin, a sul ah chun nau kiphîk a um a.

²⁸ A nau nei ding kua’n ah chun, a pakhat zawk chun a khut a hun thadok ah; naulai domnu chun, “Zia hi a suak masa zaw ahi,” ti’n a la tûk ah, a khut ah chun patsan a bûsak a.

²⁹ A khut a lak lut kit zaw in, a pakhat zaw a hung suaktha ta’n: naulai domnu chun, “Bangtidan ah pawtna ding la hun kisiam ziang ahi tam!” a ti’n. Ziaziakchun, a min in Perez a sak tai.

³⁰ Zia nung ah chun a suapi, a khut ah patsan a bûsak kha a hung suaktha ta’n: a min in Zerah a sak tai.