THILSIAM THU 23 - PATHIAN LEKHABU THIANGTHO (BSI)

Sarah Thi’na leh Vuina

¹ Sarah chu kum za sawmni leh sagi a dam ah; zia chu Sarah dam sung kumjat chu ahi.

² Sarah chu Kanaan gam ah Kiriath-arba khua (Hebron le kiti sek) ah chun a thi tai; tichun, Abraham chu Sarah sûn ah kap dingin a chia ta’n.

³ Chuleh, Abraham chu mithiluang jawn ah chun a ding ah, Hit mite kiang ah chun:

⁴ “La lak ua hin malzin leh pêm mai ka hi hen; ka mithiluang hi ka mu phâklona ka vuitheina dingin la lak uh hin kivuina ding mun pakhat ei piau in,” ti’n a don a.

⁵ Hit mite chun Abraham chu a dawnhuu ah, a kiang in,

⁶ “A la ngai tiam in, nang chu ka lak ua hin lal thupi tak la hi. Ka thân lak ua hin la nopna pen pen in la mithiluang chu vui mai in; la mithi vuina dingin ka lak ua hin kuama’n ka thân uh nang â ding ah a ît umlo ka hiu,” a tiu a.

⁷ Abraham chu a dingdok ah, zia gam ah Hit mite chu chibai bûk in a kûn ta’n.

⁸ A kiang un, “Ka mithi hi ka mulo ah vui mang pha leisak piak ua leh, ei lungsiat unla, Zohar chapa Ephron kiang ah son ei dot piak unla;

⁹ a loutaw lam ah Makpelah kawlhawm saw ei piak thei khâk leh. A man dingle a sak jat jat pia’ng ka tin; nang uh lak ah kivuina mun ah ka nei dingin,” ti’n a don a.

¹⁰ Hit mite lak ah chun Ephron chule kichu zing a hia: chuleh, Hit mi Ephron chunle Hit mite het leh a khuau kul kotkhak ah lût tapote het ah chun;

¹¹ “Hilo e he pu, ka thugen hi ngai in: lou chu ka hun pia ngal hen, a sung ah kawlbûk chule ka hun pekhawm hi; zia tak ah ka chipi um zosiate hetpi ah hi’n a leng in ka hun pedok tai: zia tak mun ah chun la mithi chu vui ziang in,” ti’n a hun dawnhu a.

¹² Ziaphatchun, Abraham in zia gam mite chu bokkhup in chibai a buk a.

¹³ Ephron kiang ah chun, a gam mite het in, “Pha lasak phot chun lungsiat tak in ei la ngai tiam in: lou man chu hun pia’ng ka tin, zia chu nang inle pom inla, zia tak ah chun ka mithi hi vui ing ka,” ti’n a don a.

¹⁴ Ephron in Abraham a dawnhu ah, a kiang in,

¹⁵ “He pu, ngai tiam in, lei pêk dangka shekel za li man bep hi nang leh kei â dingin gen khamle hiding a hem? La mithi chu vui ziang ta’n la,” a tia.

¹⁶ Abraham in Ephron thugen chu a pom ta’n: tichun, Abraham in, Hit mite zosia het ah shekel za li chu sumkawlveite’n a mat sek uh te’na chun a bûk ah, Ephron chu a pia tai.

¹⁷ Chutichun, Ephron lou mun, Mamre sualam pang ah Makpelah chu a lou tawh, a sung ah kawlhawm tawh, lou ah thing um zosia tawh, a lou kîmvêl ah thing um zosia chu tawh,

¹⁸ Hit mite mit mu leh a khawpi kul kotkhak ah lut zosia mit mu ah chun, go dingin Abraham chu piak det in a um tai.

¹⁹ Zia nung ah chun, Abraham in a ji Sarah chu Kanaan gam ah Mamre sualam pang ah Makpelah (Hebron le kiti sek) lou ah kawlhawm ah chun a vui tai.

²⁰ Lou tawh a sung ah kawlhawm chu, kivuina mun dingin Abraham kiang ah chun Hit mite chun a pia den tau hi.