THILSIAM THU 10 - PATHIAN LEKHABU THIANGTHO (BSI)

Noah Ah Kipat Namte Chu

¹ Ziate hi Noah chapate: Shem, Ham leh Japheth suante chu a hiu ah; tui lêt nung ah chun chapate a nei chiat un.

² Japheth suante chu: Gomer, Magog, Madai, Javan, Tubal, Meshek leh Tiras a hiu a.

³ Gomer suante chu: Ashkenaz, Riphath leh Togarmah a hiu a.

⁴ Javan suante chu: Elisha, Tarshish, Kittim leh Dodanim a hiu a.

⁵ Amau chu thialkâl leh tuisuagiat pâm ah chêngte suantu bulte chu a hiu a. Ziate chu Japheth suante, amau nam dungzui ah gambung chuam chuam ah, amau pau jat chuam dungzui ah chêngjakte chu a hiu a.

⁶ Ham suante chu: Kush, Aigupta, Put leh Kanaan a hiu a.

⁷ Kush suante chu: Sheba, Havilah, Sabtah, Raamah leh Sabteka a hiu a. Raamah suante chu: Sheba leh Dedan a hiu a.

⁸ Kush chu Nimrod pa ahi’n; ama chu lei chung zosia ah mihat chungnung minthang masa pen ahi.

⁹ Ama chu Lalpa ma ah chun gamvâk hat tak a hung hita’n; ziaziakchun, ahi, “Lalpa ma ah gamvâk hat Nimrod tawhbang in,” a ti sek uh ahi.

¹⁰ A hung lal patna chu Shinar gam ah Babel khua, Erek khua, Akkad khuate hi ahi.

¹¹ Zia gam ah kipat chun a pawtdok ah, Assuria gam ah Nineveh khua, Rehoboth-ir khua tawh, Kalah tawh,

¹² Nineveh leh Kalah khua kikâl ah Resente hi a hun siamdok ah; Resen chu khawlian tak ahi.

¹³ Aigupta chun Lud, Anam, Lehab, leh Naphtuh,

¹⁴ Pathrusim, Kasluhim leh Kaphtorim a hing ah, (ziate hi Philistinte suantu bul a hiu).

¹⁵ Kanaan chapa upa pen chu Sidon ahi’n; chuleh, Heth tawh,

¹⁶ Jebus, Amor, Girgash,

¹⁷ Hiv, Arkat, Sin,

¹⁸ Arvad, Zemar tawh Hamathte hi a hing ah. Ziate nung ah chun Kanaan namte chu a kithejak tau hi.

¹⁹ Kanaante gamgi chu Sidon khua ah kipat Gerar lam zuan in, Gaza khua tiang in; Sodom leh Gomorrah leh Admah, Zeboim lam zuan ah Lasha khua tiang ahi.

²⁰ Ziate chu Ham suante, amau nam dungzui leh amau pau dungzui in, amau gam chiat leh amau jat chiat ah a chên dan uh chu ahi.

²¹ Japheth u, Shem chu Eber chate zosia suanpa chu ahi’n; ama ah kipat in chate a la piang ui.

²² Shem suante chu: Elam, Asshur, Arpaksad, Lud leh Aram a hiu a.

²³ Aram suante chu: Uz, Hul, Gether leh Mash a hiu a.

²⁴ Arpaksad in chapa Shelah a hun nei ah; Shelah chun chapa Eber a hun nei a.

²⁵ Eber in chapa pani a nei ah: pakhat min chu Peleg ahi’n, ama dam lai ah chun lei hi khen in a la um ta’n; a suapipa min chu Joktan ahi.

²⁶ Joktan in chapa Almodad, Sheleph, Hazarmaveth, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ophir, Havilah tawh Jobabte hi a nei in, ziate hi Joktan suante ngen a hiu a.

³⁰ Chuleh, a umnau gam chu Mesha ah kipat sualam tâng Sephar lam, thingtâng tiang in a kithung hi.

³¹ Ziate chu Shem suante, amau nam leh pau dungzui ah, a gam leh a jat dungzui chiat ua a chêndan uh chu ahi.

³² Ziate chu Noah suante ah kipat namte chu a hiu ah; ziate ah kipat hin tui lêt zaw nung in, khawvel pumpi huap ah chêng dingin thejak in a la um tau ahi.