SOLOMON LÂ 8 - PATHIAN LEKHABU THIANGTHO (BSI)

¹ Aw, ka nu ânglai ah seilian, ka suapipa hitabang lechin aw! Pawlam ah ka hun mu si’n leh, hun chawp ziang ing ka tin, kuama’n khawk salo ding a hiu a.

² Hun pui ing ka tin, ka nu In ah hun pui lût ing ka tin, ei hingtu pindan ah chun, hun pui lût ding ka hi. Ka theibufai ga a tui kisûk, uain gimtui tawh kihel, hun dawnsak ding ka hi.

³ Aw, a veilam khut ei khapsak hen la, a changlam khut in ei kawi ta maleh!

⁴ Aw, Jerusalem nungakte haw, ka kihepinau a guitun masia, ei subuai lo dingin ka hun tiam la hiu.

In lam Hun Zuan Numei:

⁵ A ngai pen chung ah kiliang bât ah, gamthip ah kipat hung to saw kua a hem? Theipi bulnuai ah ka hun phawnghal tai. Zia tak ah chun la nu’n a hun hin la hi’n; zia mun ah chun nangma hun vopnu hun hin la hi.

⁶ La bânpuam ah tepte’na um gual ah khan, la lungchang ah tepte’na’n ei koi in; thi’na gual tuk in hepina hile a hat in, ûtna hile mithi khua gual khop in a hat hi. Meikuang gual in a diang jak in, gamkâng mei gual in a jam jak hi.

⁷ Tui tam tak inle hepina a hidai thei pua’n, tuisânglêt inle a chup mang thei puai. A In sung nei leh lam zosia, hepina man dingin pe maleh, zia chu bangma kham ahi puai.

Numei upate:

⁸ Suapi numei naupang nawi le nei nai lo khat ka nei un. Ama hung hêl a um phat leh, ka naunuu chu bang ka bawl piak ta diam uh?

⁹ Ama chu bâng hileh chu, a chung in dangka Insâng lem ing ka tiu in; kotkhak hitaleh chu, sidar thingpêk in khak khum ing kau.

Numei:

¹⁰ Kei chu bâng ka hi hen, ka nawite chu Insâng gual ahi; a kiang ah chamna thu pawtu gual in, a mittha’n ka châmden tai.

Pawsal:

¹¹ Solomon in Baal-hamon ah grep huan a nei in, grep huan chu a enkolte khut in a pedok ah; mi tin chun a ga chawkna dingin, dangka sang khat chiat a piak diu ahi.

¹² Ka grep huan, kei â ngei chu ahi; nang Solomon in sang khat chu nei in la tin, theiga vêngte chun za ni chang in au.

¹³ Nang huan ah chêng, ka lawite’n la aw a ngaitha nuam ui; ei hun ngaithâksak ta’n la!

Numei:

¹⁴ Hung kin in, ka hepi, gimtui chînna tâng ah sakêl leh, zukchal gual ah kin in hung in!