SOLOMON LÂ 6 - PATHIAN LEKHABU THIANGTHO (BSI)

Jerusalem Nungakte Dawnhuna Numei:

¹ Aw numei lak ah mêlpha pen, la lawmpa chu khoilam ah chia a hem? ka hun hawlpi theina ding un ei hil in.

² Ka ngai pen chu a huan in a chia suk in, gimtui thingte umna mun ah, hampa hing dip dep huan ah, a gan honte an pia ding leh, lili pâkte loding in.

³ Kei chu ka ngai pen â ka hi’n, ka ngai pen chule kei â ahi; a gan honte chu lili pâk lak in a tatsak hi.

Pawsal:

⁴ Aw ka hepi, Tirzah gual leh, Jerusalem gual ah et lawm leh; sepai hon a diallap tawh, kizawtte gual ah tizat um la hi.

⁵ La mit in ei en ta kin, lei hîp ta luai! La sam chu Gilead tâng ah kipat, kêlcha hon hung kum suk tawh a bang hi.

⁶ La hate chule gan hon lak ah belampi, kisil thiang ah hung pawtdok, a leng ua no kiphîk nei chiat, no bei khatchale umlo gual chu ahi.

⁷ La maikhûna nuai ah la biang chu, theibufai ga san a bang hi.

⁸ Lengnu sawmguk tawh, thâikem sawmgiat tawh nungak simsên lo le a um ui!

⁹ Ka vakhu, demna ding umlo chu khat a um in; ama chu a nu cha changkhat, a hingnu’nle a hawmthaw ma ma chu ahi. Nungakte’n a muu in, hampha a sau hi; lengnute leh thâikemte’nle a pakcha chiat ui.

¹⁰ Kua a hem jing nino gual leh, thapi gual ah mêlpha, nisa gual ah vâk, sepai hon diallap tawh, chiate gual ah tizat um chu?

¹¹ Phâijawl ah pâkchate thîl ding leh, grepte a mûm tau em, theibufaite a selthak tau em ti en dingin, thei huan ah chun ka chia suk a.

¹² Ka hung kihiatdaw masang in ka ngaituana chun, lalte kiang ah kângtalai ah chun ei la koi tai.

Numei:

¹³ Hung kihei kit in, hung kihei kit in! aw Shulam mi, hung kihei kit in, hung kihei kit in! sepai lâmte gual ni kikâl ah et gual in; bang ding ah Shulam mi hi, en ding la hiu em?