SOLOMON LÂ 5 - PATHIAN LEKHABU THIANGTHO (BSI)

Mo leh Monu Kiho’na

¹ Ka huan ah ka hung hi, ka suapinu, ka lawmnu; ka murra tawh gimtuite tawh ka lakhawm ah, ka khuaiphâng ah khuaizute ka ne ta’n, ka uain tawh bawngnawi ka dawn tai. Gualte, hepina la kham hial masia ne’n la, dawn in!

Numei:

² Ka ipmu, maleh ka lungthim a hal zing hi. Ngai in, ka ngaijawng in kotkhak a hun kiu hi! Ka In vakhu, ka ngai bâng lo; ka sam hi daitui in a chêk hen, ka baksam le jan dâichîm in a chêk zo tai”.

Pawsal: Numei:

³ Ka puanâk chual ka sût ta’n, bangti’n âk kit ding ka hi tam? Ka kengte ka silthiang ta’n, bangti’n hi’nîn kit mai ding ka hem?

⁴ Ka ngai pen in kot kamna a hun bân a, ka laigil chu ama ngâi in a tawi hi.

⁵ Ka ngai pen kot hon dingin ka tho ta’n, murra lak in ka khut ka dia ah; ka khutzungte chu murra tui ah chêk in, kot kamna chu ka vak tu tai.

⁶ Ka ngai pen â dingin kot ka vak hong ta’n, maleh, ka ngai pen chu, a la kiheimang in ei la taisan tai. Ama’n ei ho lai khan ka dawnhu dukdak pua ahi. Ka hawl jel ah, ahi’n, ka mu zo diak ta puai; ka ko ah, ahi’n, ei dawnhu ta puai.

⁷ Khawpi sung ah vâk tawl tawl, gâlvêng mite chun ei muu a; ei jep ua, ei vaw liam ui; kulpi vêngte chun ka puansil ei lâkpiak ui.

⁸ Aw Jerusalem ah nungakte haw, ka lawmnu chu la muu leh, zia hi ei hun gen piak dingin, ka hun ni la hiu: Ama ngai ah thakhamvei ka hi.

Pawsal:

⁹ Aw, numeite lak ah mêlpha pen, la lawmnu chu la jawl dangte sâng ah, bang gual chungchuanna nei a hem? La lawmnu chu la jawl dangte sâng ah, bang gual chungchuanna a nei ziak ah, zia gual ah chu ei vâithâk la hem?

Numei:

¹⁰ Ka lawmpa chu a sansua in a et lawm hen; sang sawm lak ah a pha pen ahi.

¹¹ A lujang chu sana thiang tak gual leh, a sam chule a buk in, va-ak mul gual mai in a vom hi.

¹² A mitte chule tuinâk hing tak kiang ah, vakhu a bang in, bawngnawi ah kisil zo, hung kichawidok pan a bang hi.

¹³ A biangte chule pakcha huan, gimtui ah dim tawhbang ahi. A mûkte chule lili pâk lak ah, murra gimtui in a vat khum tawh a bang hi.

¹⁴ A khutbânte chule sana leh, suang mantam ah kichei a bang hi. A pum chule saiha vâm, sapphire suang mantam ah kisiam gual ahi.

¹⁵ A kengte chule alabastar gimtui ah kisiam khuam, sana khuamkua ah kitung tawhbang ahi. A mêl lat dan chu Lebanon tâng ah, sidar thing mêlpha pente gual chu ahi.

¹⁶ A tongkam chu a thum pen ah, a ngaikâi suak kêi hi. Zia chu ka lawmpa leh, ka gualpha chu ahi; aw Jerusalem ah chanute haw.