SOLOMON LÂ 4 - PATHIAN LEKHABU THIANGTHO (BSI)

Mo Mêlphatna Pakchatna Pawsal:

¹ Ka hepi, la mêl a pha na lawm lawm e! La vakhu mitte chule la maikhûna’n a lia hi. La sam chule Gilead tâng ah, kêl hon tawh a bang hi.

² La hate chule belam mul kimêt zo pan ah, kisil thiangte gual in a vam in. A leng un a phîk ngen a piang un, khat chale a piangsual a um puau hi.

³ La mûkno chu puan sandup a bang in, la kamsuak chu a ngaikâi hi. La maikhûna nuai ah la biangte chu, theibufai ga san a bang hi.

⁴ La ngawng chule David gâlvenbûk sâng a bang hen; la khival, kido’na phawlian leh, phawneu sang khat kithiat a bang hi.

⁵ La nawite ni chule sazuk no suak kop, lili pâk lak ah ta chu a bang hi.

⁶ Nisa a hung nêm ah, nilîm liapte a bei masia; murra umna tâng leh begaw gimtui, umna mualte ah chun, kin tak in chia to ding ka hi.

⁷ Ka hepi, La mêl chu a pha bukimna lawm lawm e! nangma ah chun demna ding him him a um puai.

⁸ Lebanon tâng ah kipat in, ei hun zui in, ka lawmnu; Lebanon tâng ah kipat in ei hun zui in. Sakeibakneite kul ah kipat leh, gialbemte chênna tâng; Amanah tâng ah kipat leh, Hermon tâng ah kipat leh, Senir tângvûm ah kipat in hung kum suk in.

⁹ Nang in ka lungthim la hip mang tai, ka suapinu leh ka lawmnu; lei khatvei mel mai leh, la ngawng ah sana khi chang khat mai hinle, ka lungthim zosia la hip mang zo sek hi.

¹⁰ Ka suapinu, ka lawmnu, la hepina chu a nuam na lawm lawm e! La hepina hi uain sâng ah, bang gual bep ah phazaw ahi tam! La sathau gimtuite chule, thil gimtui dang zosia sâng ah, bang gual bep ah tuizaw ahi tam!

¹¹ Ka lawmnu, la mûk ah chun, khuaizu thiang a um in; la kam ah chun khuaizu leh, bawngnawi a um hen; la sil leh chênte chu, Lebanon gimtui gim a nam hi.

¹² Huan kikhâk chu ka suapinu, ka lawmnu ngei chu ahi’n; huan kikam chak leh tuikhuk kikhâk chu, ama ngei chu ahi.

¹³ La sung ah lohingte chu, theibufai pâk hingte chu ahi’n; theiga tui pente chu ahi’n, henna pakcha leh nard gimtuite ngei chu ahi’n;

¹⁴ nard leh safronte, tuikep pâk leh thinggâi gimtui, begaw thing leh murra leh aloe gimtuite–

¹⁵ huan ah tuinâk pût, tuihing nâkte, Lebanon tâng ah kipat luang gual chu ahi.

Numei:

¹⁶ Aw mal huithi, hung thodawk inla, aw simthi, hung in! A gim namtui in gam tin jel hen la, ka huan sung ah hung nung in. Ka ngai pen chu ka huan ah hungsak unla, a thei ngainat pente chu hung ne hen.