SOLOMON LÂ 3 - PATHIAN LEKHABU THIANGTHO (BSI)

Ngaijawng Mangmatna

¹ Jan ah ka lupna chung in, ka thangai pen chu ka hawl a, ka lunggil in ka hawl pek a, ahi’n, ka mu zo puai; ka ko in, ei dawnhu diak puai.

² “Tu’hin kipan in, khawpi sung hawl vêl ing ka tin, kotzing leh Inthêl kâl tin hawl ing ka; ka hinna’n a thangai pen chu, hawl ing ka,” ka ti’n. Ka hawl ta ngei ah, ahi’n, ka mu zo diak ta puai.

³ Khawpi sung ah vâkvêl gâlveng mite’n ei muu a: “Ka hinna’n a thangai pen kha la muu em?” ka ti’n.

⁴ Amau ka kituakpi zaw zaw ah chun, ka hinna’n a thangai pen chu ka mu tai. Ei hingtu, ka nu pindan sung ngei ah, ka pui lût masang sia tha’suak talo dingin ka tuchak tai.

⁵ Aw Jerusalem ah nungakte haw, sakêl a hem zukchal tuaidawng a hem min in, ka hun tiampi la hiu: Ka kihepinau chu ei subuai kiu in.

Numei:

⁶ Gamthip ah meikhu gual ah, hung to khi bang a hia, murra leh begaw gimtui tawh, sumkawlveite thil gimtui zosia ah sugimtui ngei chu?

⁷ En in, lâng ah um chu Solomon ahi! A kîmvêl ah chun Israel mihat leh têlchuam sawmguk a um un;

⁸ kido dan thiam ngen in, chemjam a chawi chiat ui; jan ah kido’na husa thawm ziakin, a kawng un chemjam a kivop chiat ui.

⁹ Lengpa Solomon in Lebanon ah thingte mang in, lalchutpha a kisiam in.

¹⁰ A khuamte chu dangka thîk in a siam a, a nung lam chu sana thiang, a sung lam chu hepina ahi. Aw, Jerusalem ah nungakte haw,

¹¹ hung pawtdok tau in. Aw Zion nungakte haw, Lengpa Solomon a ji nei ni a lungthim kipak ni ah, a nu’n lal lukhuk a khuk sak hi, hung en ma tiam un!