SAM 94 - PATHIAN LEKHABU THIANGTHO (BSI)

Midikte Phuba Latu Pathian

¹ Aw Lalpa, nang phuba la Pathian, nangma phuba latu Pathian, hung vâkdok ta’n!

² Aw lei chung ah vaihawmpa, hung kipan inla, mi kisatheite kisaktheina gûn chu hun pia ta’n!

³ Aw Lalpa, mi nunsia chu bang chan, mi nunsia chu bang chan him him, ki-uansak tak ah um ding a hiu em?

⁴ Amau chun kisathei tak in thu a gen un, a thil phalo bawl zosiau a kisuanpiu hi.

⁵ Aw Lalpa, la mite a gawtbuang un, la gochan chu a engbawl ui.

⁶ Meithâi leh malzin a that un, nauchaga a that un,

⁷ “Lalpa‘n a mu pua hen, Jakob Pathian in a hepuai,” a tiu hi.

⁸ Mi lak lak ah thada pente haw; mingol, bangtik leh hung pil ding la hem?

⁹ Bil siampa chun he lo ding a hem? Mit siampa chun mu lo ding a hem?

¹⁰ Namtin thunun ah, mi tin pilna hilpa chun hun zilgai lo ding a diam?

¹¹ Lalpa‘n mihing ngaituanate hi bangmalo mai mai ahi, ti a he ma ma ngal a.

¹² Aw Lalpa, la thunun ah, la dan dungzui ah la zilsakte chu, mi hampha a hiu in,

¹³ mi nunsia â ding ah kawkhûk chaw ah a um masia’n, lungjin nite ah cholna la piak theina ding ah, la zilsakte ngei chu.

¹⁴ Lalpa‘n a mite hemil pua’n tin, a gochante chule nusia diak pua’n a;

¹⁵ mi dikte chung ah vaihawmna dik kile’kit intin, lungthim dik zosia’n zia chu zui in au.

¹⁶ Kua a hem ka thasâng ah mi nunsiate, do ding ah kipan ding? Kua a hem ka thasâng ah thil phalo bawlte, do ding ah ding ngam?

¹⁷ Lalpa ei panpipa a la hilo leh vang, ka thagau hi kin tak in mithi khua’n, a la lût ta ding ahi.

¹⁸ “Ka keng a teu hi,” ti ka ngaitua phat leh aw Lalpa, la ja’ngaina’n lei la kaibât hi.

¹⁹ Ka lungthim a lungjin lai in, la thamuannate’n ka hinna a suhal kit sek hi.

²⁰ Vaihawmtu diklote, dawha phalo tak ah dan siamte chu tawh, kithua theina nei ding la hiu em?

²¹ Midik hinna lâk gua’n a pung khawm un, mawna bei chu thi dingin thiamlo a chansak ui.

²² Himaleh, Lalpa chu ka kulpi det a hung hi hen, ka Pathian, ka kisêlna suangpi chu a hung hi tai.

²³ Ama’n a gitlo man uh a chung un din intin, a gitlonau ziakin nuaimang in a; Lalpa, I Pathian un amau chu nuaimang ding ahi.