SAM 91 - PATHIAN LEKHABU THIANGTHO (BSI)

Pathian Vênbit Hetchianna

¹ Nang Chungnung Penpa bitna mun ah chêng ah, Bangkim Hi’theipa lîm nuai ah um zingte chun,

² Lalpa kiang ah chun: “Ka kihumbitna leh ka kulpi, ka Pathian, ka muan chu la hi,” ti’n la.

³ Ama’n thâng ah kipat leh thi theina hipi lak in, hun hukhing ding ahi ngal in;

⁴ a tha chun hun khû intin, a thalîm nuai ah chun bit tak in um in la tin; a ginumna chu phawlian leh phawneu ahi ngal a.

⁵ Jan thim chu lau pua’n la tin, sûn ah thalchang lengte le lau diak pua’n la,

⁶ thim nuai ah hî leng lau pua’n la tin, sûnchang lai ah siatna chule lau diak pua’n la.

⁷ La sîk ah mi sang khat kilîk intiu in, la khut changlam in mi sîng khat kilîk in au, himaleh, nang vang hun naipua’n au.

⁸ La mit in en in la tin, mi nunsiate gawtna chu mu ding la hi.

⁹ Lalpa chu kihumbitna la nei ziak leh, Chungnung pen chênna, In ah la nei ziakin,

¹⁰ la chung ah thil phalo tung pua’n tin, siatna’n le la chênna hun naipua’n a.

¹¹ La lampi tincheng ah hun vêng dingin, la chung thu ah a vansawlchâkte, thu pia ding ahi ngal a.

¹² A khut un hun dom intiu in, achutiloleh, la keng in suang suikha ding la hi.

¹³ Sakeibaknei leh thangchom chuan den in la tin, sakeibaknei vanglai leh gulpi chu, chuanchil ding la hi.

¹⁴ Ei hepite chu hukdok ing ka tin, ka min hete chu vêng bit ding ka hi.

¹⁵ Ei hun ko phat uh leh dawnhu ing ka; a lungjin lai un umpi ing ka tin, hukdok in chawisâng ding ka hi.

¹⁶ Dam sawtna’n ama hi’lungawi ing ka tin, ka hukdamna musak ing ka.