SAM 9 - PATHIAN LEKHABU THIANGTHO (BSI)

Pathian Thilhitheina leh Vaihawmna David Pâkna La

¹ Ka lungthim zosia’n Lalpa kiang ah kipak thu gen ing ka tin; la thilmak bawl zosia genjak ding ka hi.

² Nangma ah lim ah kipak in; aw, Nang Chungnung pen, la min pâk in La sâng ka.

³ Ei do-te a taijak tak uh leh, la ma-âng ah kipûk in, a mangthai zo tau hi.

⁴ Ka dikna dungzui in ka chung ah thu tan inla, lalchutpha ah chun dik tak ah vaihawm dingin la chu ta’ngal a.

⁵ Namtin la zilgai ah, mi nunsiate la gawt chimit ah, a min uh le kumtuang, kumtuang â dingin la thai mang tai.

⁶ Mêlmate chu kumtuang siatna’n a mangthai tau a; a khawpiteu la chomnâm ta’n; amau hetzingna a mangthai tai.

⁷ Himaleh, Lalpa chu kumtuang ah lal hiding in a chu hen; a lalchutpha le vaihawmna dingin a phudet tai.

⁸ Dikna’n khawvel hi vai a hawm ah; mitin chung ah dik tak in vai a hawm hi.

⁹ Sukgenthei ah umte â dingin Lalpa chu kulpi ahi’n; lungjin lai ah kulpi ahi.

¹⁰ Chuleh, la min hete chun a hun taksang un; aw Lalpa, nang in vang a hun hawlte chu la kilepsan ngai puai.

¹¹ Zion ah um Lalpa chu pâk in La sau in. A thilbawlte nam tin kiang ah puangjak un.

¹² Thisan phuba la sekpa chun amau a khawksak ngal a; hi’genthei ah umte kiko aw a hemil ngai puai.

¹³ Aw Lalpa, ei lungsiat in. Ei mudate ei hi’genthei dan hi hia’n ei hepi inla; nang chu thi’na kotkhak ah kipat ei kaidokpa la hi’n;

¹⁴ nangma pâkna zosia chu hiatsak ing ka tin; Zion chanu kotkhakte ah chun, lei hukdawna ziak ah ka lim theina dingin.

¹⁵ Namtin a kawkhûk siam un a ke’lut tau in; a gûkah a lên jak ua chun a keng un a awk tau hi.

¹⁶ Lalpa chu a kiang un a kihiatsak ta hen, vai a hawm tai; mi nunsiate chu amau khutsuak ah chun a awk tau ahi.

¹⁷ Pathian hemil nam zosia leh mi nunsiate chun, Sheol lam zuan ta’n au.

¹⁸ Tasamte chu hetmil in um den pua’n tiu in, migentheite kinepna chule kumtuang in mangthai pua’n a.

¹⁹ Aw Lalpa, hung kipan tiam in! Mihing mai mai hi gual zaw sak kin; la âng ah namtin vaihawm piak in um tau hen.

²⁰ Aw Lalpa, amau chu hilau in; namtin in mihing bep a hiu ti kihe tau hen.