SAM 89 - PATHIAN LEKHABU THIANGTHO (BSI)

David Kiang ah Pathian Thuthung Ezra mi Ethan Maskil

¹ Aw Lalpa, la ngilneina chu, kumkhua’n la’n sâng ka tin; la ginumna chu suan zosia tiang in ka kam in hetsak ing ka.

² La ngilneina chu kumtuang â di’n phudet ahi’n, la ginumna chule vante gual ah phudet ahi, ti’n ka hetsak tai:

³ Nang in, “Ka têlchuam kiang ah, thuthung ka siam ta’n, ka suak David kiang in sia ka sam tai;

⁴ La suante chu kumtuang dai dingin phudet ing ka tin, la lalchutpha chule suan zosia â dingin, lem ding ka hi,” la ti ta ngal a.

⁵ Aw Lalpa, vante khin la thilmak bawlte chu, pâk uh hen la, mithiangthote kikhopna mun ah chun, la ginumna chu pâk tau hen.

⁶ Vante ah khin Lalpa tawh te’pi thei ding kua a hem um? Van ah umte lak ah Lalpa tawhbang kua a hem um ah,

⁷ mithiangthote kikhopna a lau uh Pathian, chung lam ah a kiang ah um zosia lak ah, thupi leh ja um tak chu kua dang a hem?

⁸ Aw Sepai honte Lalpa Pathian, aw Lalpa, nangma tawhbang ah, hât kua dang a um em? La ginumnate chun a hun hual kîmvêl hi.

⁹ Tui kinawk nasa takte chung in vai la hawm ah; a tui kinawk phat leh nang in la chawlsak sek hi.

¹⁰ Rahab chu sapûl thi gual in la tawden in; la mêlmate chu la bân thahât in la thejak tai.

¹¹ Vante khi nang â ahi’n, lei hile nang â ahi; khawvel leh a sung ah thil um zosia hile, nangma siam ngen a hiu.

¹² Mallam leh simlam nangma siam ahi’n; Tabor leh Hermon tângte chun, lim tak in la min a pâk ui.

¹³ Khutbân thahât tak la nei in; la khut a hât in, la changlam khut chu choisa’n in a um hi.

¹⁴ Dik tatna leh vaihawmna dik, la lalchutpha kingakna ahi’n; ngilneina leh ginumna la ma-âng in a chiau hi.

¹⁵ Luaithena husa hete leh, aw Lalpa, la mêlvâk ah chiate chu mi hampha a hiu hi;

¹⁶ la min ziakin sûn nitum in a lim un, la dikna ziakin choisa’n in a um ui.

¹⁷ A hâtnau lopi tak la hi’ngal a; la doisakna ziakin ka dinmun uh, choisa’n in a um tai.

¹⁸ Ka phawu hi Lalpa â ahi’n, ka lengpau hi Israel Mithiangtho â ahi.

¹⁹ Malai ah chun la mi ginum kiang in, kilâkna’n thu la gen a; “Mihat chung in ka lallukhuk ka koi in, mipite lak ah kipat têlchuam ah um chu ka chawihoi tai.

²⁰ Ka suak David ka hawldok ta’n, ka sathau thiangtho kanu’ tai;

²¹ ka khut thahât in umpi zing intin, hi’hât ding ka hi.

²² A mêlmate’n tuk pua’n tiu in; mi nunsiate’n le a tawden ngai puau hi.

²³ A mêlmate chu a ma-âng un sukgawp piak ing ka tin, ama mudate vaw pai ing ka.

²⁴ Ka ginumna leh ngilneina’n umpi zing intin; ka min ziakin a kî choisa’n in um in a.

²⁵ A khut tuisuagiat chung in ngaksak ing ka tin, a khut changlam luipite chung ah nga’n ah.

²⁶ Ama’n kei kiang ah, ‘nangma hi ka Pa, ka Pathian leh ka hukdamna Suangpi chu la hi!’ ti’n a.

²⁷ Ka cha lutîl in siam ing ka tin; lei ah lalte lak ah chungnung pen in siam ing ka.

²⁸ Ka ngilneina kumtuang in a chung in um zing intin, ka thuthung le a kiang in um zing in a.

²⁹ A suante chu kumkhua’n umsak ing ka tin, a lalchutpha chu vante a um laisia umsak ding ka hi.

³⁰ A chate’n ka dan thu a kihei mangsan ua, ka thuguat dungzui ah a umlo ua leh,

³¹ ka dan thuguatte a bawsiat ua, ka thupiakte a zui nop lo ua leh vang,

³² zia phat chuleh, a hi’khialnateu ziakin, mol in sawi ing ka tin; a thulim lonateu ziakin jep ing ka tin,

³³ ahi’n, ka ngilneina chu a chung ah kipat, lamang ziang sam lo ding ka hi; ka ginumna zuau ah chansak diak pua’ng ka.

³⁴ Ka thuthung botsia pua’ng ka tin, ka kam ah thupawt le hi’lamdang diak pua’ng ka.

³⁵ David chu thêm pua’ng ka, ti’n ka min thiangtho sâl in kumtuang â dingin, thu ka la tiam ta’ngal a.

³⁶ A chisuante chu kumkhua’n um zing intiu in, a lalchutpha ka ma-âng ah, nisa gual in um zing ding ahi.

³⁷ Thapi gual in kumkhua’n phudet in um intin, vante ah khin hiatpitu gual in um zing ta’n a,” a ti’n.

³⁸ Himaleh, nang in tu’hin la pâm pai in, la dawi ta pua’n; la sathaunu’ chung ah lungnatna’n la dim tai.

³⁹ La suak kiang ah la thuthung la botsia ta’n; a lal lukhuk le leivui lak in la paitha tai.

⁴⁰ A pal zosiau la phiat piak ah; a kulpidetteu le la khênse tai.

⁴¹ A haw kha taphot in a van uh chu a kilâk sek un; a kîmvêl ua mite nuisan in a um tau hi.

⁴² A mêlmateu khut changlam la choisa’n piak ta’n; a mêlmateu la kipak sak tai.

⁴³ A chemjam hiamte matna bei in la koi ta’n, kidona mun inle la panpi ta puai.

⁴⁴ A khut ah kipat lal tiang la ladok ah, a lalchutpha le lei tual in la paitha tai.

⁴⁵ A khangdawng lai nikhua la sukchom piak ah; zachâkna’n la khû tai.

⁴⁶ Aw Lalpa, bang chan hiding a hem? kumkhua’n ei kisêl mangsan ding la hem? La lungnatna chule mei gual ah, bang chan kuang ding a hem?

⁴⁷ Ka damsung nikhua chomdan hezing inla, mihing chate hi la siam gina paw na maijen e!

⁴⁸ Kua a hem thi lo ah hing zing ding? Kua a hem Sheol thilhitheina kipat, suakcha ma ma ding?

⁴⁹ Lalpa, malai ah la hepina, la ginumna ziak ah David kiang ah la tiamsa kha, khoi ah um a hita’m?

⁵⁰ Aw Lalpa, la suak a hosiatnau leh, mipite ei hosiatna a gûk ah ka thok dan hi, hezing inla;

⁵¹ aw Lalpa, nangma do-te gensiatna, la sathaunu’ kengnungte a gensiatnau chu ahi.

⁵² Lalpa chu kumtuang ah pâk in um ta hen. Amen, Amen.