SAM 86 - PATHIAN LEKHABU THIANGTHO (BSI)

Mêlmate Lak ah panpi ding ah Chialna David Pauchapna

¹ Aw Lalpa, ka lam ah hin la bil hun daw inla, ei dawnhu in, chaga leh tasam ka hi’ngal a.

² Ka hinna vop pha’n, nang â dingin ka ginum in, nang hun taksang la suak hi hukdam in. Nang ka Pathian la hi’n,

³ aw Lalpa, ka chung ah ja’ngai in; sûn nitum ah ka hun ko la hi’ngal a.

⁴ La suak hinna kipak sak inla, aw Lalpa, ka thagau in, nangma lam ka hun nga tai.

⁵ Aw Lalpa, nang chu la pha’n, ngaidam pei, a ko tapote chung ah, ngilneina hau la hi’ngal a.

⁶ Aw Lalpa, ka pauchapna hin la bil hun daw in; lungsiat in ka nina aw hi a la ngaitha’n.

⁷ Lungkham ni’n hun ko ing ka tin, nang in ei dawnhu ding la hi.

⁸ Aw Lalpa, pathian dangte lak ah, nangma gual a um pua’n, la thilbawlte gual bawlthei le a um puau hi.

⁹ Aw Lalpa, la siamsa nam dang zosia chu, hung intiu in, la ma’n hung kûn intiu in, la min hun chawihoi ta’n au.

¹⁰ Nang la lopi in, thilmakte la bawl sek hi; nangma bep Pathian la hi.

¹¹ Aw Lalpa, la lampi chu ei kawkmu in, la thu tak ah ka chiatheina ding leh, la min ka ja theina dingin, lungthim thiangtho ei pia’n.

¹² Aw Lalpa ka Pathian, ka thinlung zosia’n hun pâk ing ka tin, la min chu kumkhua’n chawihoi ing ka.

¹³ Ka chung ah la ngilneina a nasat ziakin, ka hinna Sheol khûkthim pen ah, kipat in la hukhing tai.

¹⁴ Aw Pathian, mi kisatheite chu, ei do dingin a hung kipan un; mi nunsia pawlte chun ka hinna, himang gua’n ei hawl un, nang a hun malat ngai puau hi.

¹⁵ Ahi’n, aw Lalpa, nang chu Pathian, lainatna dim leh, mi hepi thei, lungnem, ngilneina leh thu tak ah dim la hi.

¹⁶ Ka lam hun nga’n la ei hepi ta’n; la suak hi la thahâtna ei pia’n la; la suaknu chapa hi hukdok ta’n.

¹⁷ Lei doichuamna tepte’na chu ei etsak inla; tichun, ei mudate chun a muu ah, a mualpho theina ding un. Lalpa, ei panpipa leh ei thamuanpa chu, nangma la hi.