SAM 85 - PATHIAN LEKHABU THIANGTHO (BSI)

Pathian Doisakna Tungding Kît Ding ah Pauchapna Korah Chate Pâkna La

¹ Lalpa, la gam hi la doisak hen; Jakob vangphatna la pia kit tai.

² La mite dukdaklona la ngaidam ta’n; a gitlonau zosia la ngaidam tai.

³ La lungnatna zosia la lamang ah; la lungnatna huaisia tak chun la kihei mangsan tai.

⁴ Aw, ka hukdamnau Pathian, ei tungding kit inla, ka chung ua la lung hilona chu koimang ta’n.

⁵ Kumkhua ka chung ua lungna ding la hem? A khang a khang ah ka chung ua lungna ding la hem?

⁶ Nangma ah la mite a lim theina ding un, ei hihal kît lo ding la hem?

⁷ Aw Lalpa, la ngilneina chu ei musak inla, la hukdamna chu ei pia ta’n.

⁸ Lalpa, Pathian in a thugen ding chu, ngaitha’ng ka tin, a mite leh a mi thiangthote kiang ah, thamuanna ding thu gen ding ahi ngal a; lungthim gil tak ah ama lam ah, kihei kit tapote kiang ngei ah chun.

⁹ A hukdamna chu ama laute nai ah chun a um sek in, I gam ua a lopina a um den theina dingin.

¹⁰ Ngilneina leh thutak kituak intiu in; dikna leh kichamna kichawptua ding a hiu.

¹¹ Ginumna chu lei ah kipat in hung dawndok intin; dikna chun van ah kipat hun en suk in a.

¹² Lalpa‘n thilpha ngen hun pia’n tin, I gam un a gate pung in a.

¹³ Dik tatna’n ma pui intin, a kalsuanna ding lampi siam in a.