SAM 83 - PATHIAN LEKHABU THIANGTHO (BSI)

Israelte Mêlmate Chung ah Vaihawm Ding ah Dotna Asaph Pâkna La

¹ Aw Pathian, thip hiat hiat kin; aw Pathian, thipbek in um kin la, um hiat hiat ziang kin!

² Tu’hin le, la mêlmate chu a siatchang uh a so in; nangma hun mudate chu a hel zo tau hi.

³ A gûk ah la mite do-na ding dawha phalo a bawl un; la mi panpite siatna ding ngaitua’n a kiho-khawm ui.

⁴ “Hung un, a nam uh nuai chimit hitiu in; Israel min him him het hita lo dingin bawl hitiu,” a tiu hi.

⁵ Kithu gual tak in a guanggal un, la chung ah thil phalo bawl dingin, thuthung a siam un:

⁶ Edomte leh Ishmaelte, Moab leh Hagar suante,

⁷ Gebal leh Ammon leh Amalek, Philistin leh Tura ah chêng zosia;

⁸ Assuria inle amau a panpi in, zia zosia hi Lot suan ah mi hâtte chu a hiu.

⁹ Wadi Kishon ah Midiante, Sisera leh Jabin chung ah la bawl gual khan, amau chung inle hun bawl inla;

¹⁰ amau chu Endor khua’n a mangthai un, lei â ding ah êknîn gual bep a hitau hi.

¹¹ A milianteu chu Oreb leh Zeeb gual leh, Zebah leh Zalmunna lal chate gual in bawl in,

¹² amau chun, “Pathian gantatna munte chu, lâkpiak hitiu,” a tiu hi.

¹³ Aw ka Pathian, amau chu chîmpei in, leivui a pei gual in pei inla, hui in busi a mut gual hin umsak in.

¹⁴ Mei in gammâng a hâlthut gual leh, meikuang in tâng a tuam suak gual in,

¹⁵ amau chu la huipi’n del inla, la thigawpi nasa tak chun hilau ta’n.

¹⁶ Aw Lalpa, la min a hun hawl theina ding un, a mai uh zachakna’n tuam in.

¹⁷ Kumkhua’n zakcha tak leh, lungkham tak in um uh hen la; mualpho tak in mangthai tau hen.

¹⁸ Nangma bep hi Lalpa min pu, leilung zosia chung ah Chungnung pen la hi ti, a hun hettheina ding un.