SAM 81 - PATHIAN LEKHABU THIANGTHO (BSI)

Israel Lochalte Pathian Chialna Asaph La

¹ I hatnau Pathian chawihoi in lim tak in La sau inla; Jakob Pathian chawihoi in lim tak in kiko un.

² Pâkna La sau inla, khuangneute, pekkhuang ngainop umte leh, tingtangte’n ama chawihoi un.

³ Thathak leh I kût hunbiu thalik lai tak inle, pengkul mût un.

⁴ Israel â ding ah thuguat, Jakob Pathian ngei in dân a la piak chu ahi ngal a.

⁵ Zia chu Joseph kiang ah, Aigupta gam ah kipat a pawt daw lai ua, thuthung a la piak chu ahi. Ka het khâk lo aw khat ka hia’n:

⁶ “La liangko ah puakgikte chu ka dawnjang in; la khutte chule sêng ah kipat in ka ladok tai.

⁷ Lungjin ni’n lei ko ah, ka hun hukdok ta’n; vân-git kisêlna mun ah kipat in ka hun dawnhu in; Meribah tui munte ah khan ka hun patep la hi. (Selah)

⁸ Aw ka mite haw, ka hilna thu hi ngai un; Aw Israel, ka thu ngaitha nuam ta maleu chin uh aw!

⁹ Gamdang pathian la lak un umlo ding ahi’n; pathian dang le ho diak lo ding la hiu a.

¹⁰ Kei Lalpa, la Pathian uh, Aigupta gam ah kipat hun puidokpa chu ka hi. La kam lian tak in kân, hun sung dim ding ka hi.

¹¹ Himaleh, ka mite’n ka aw a ngai nuam puau a; Israelte’n ka thu a mang puau hi.

¹² Tichun, a lungthim nop gual gual ua um dingin, ka thathawt ta ahi.

¹³ Aw, ka mite hin ka thu ngai in, Israelte hin ka lampite a la hawleu chu aw!

¹⁴ Kin tak in a mêlmateu chu tawden piak in, a mêlmateu chung ah ka khut lek ding hiveng!

¹⁵ Lalpa hawte chu amau lau in kûn in au; a siatnau chun vang kumtuang dai ding ahi tai.

¹⁶ Gehu an phapen in nang chu vâk ta’ng ka tin; suangpi kipat khuaizu’n hitai ding ka hi,” a tia.