SAM 80 - PATHIAN LEKHABU THIANGTHO (BSI)

Israelte Tundin Kîtna Ding ah Pauchapna Asaph Pâkna La

¹ Aw, Israelte vengpa, belam hon gual ah Josephte puipa, la bil hun daw in! Nangma cherubte chung ah kichupa, hung vakdok inla,

² Ephraim leh Benjamin leh, Manassehte mit mu ah chun, la hâtna hun sua inla, ei hukdok dingin hung in!

³ Aw Pathian, ei tung ding kit in; hukhin ah ka umtheina ding un, la mêl hung vâk ta hen.

⁴ Aw Lalpa, sepai honte Pathian, bang chan a hem la mite pauchapna chung ah la lungnat ding?

⁵ Amau chu mitthi tui ah kisiam vaithum ah la vâk ah, mitthi tui a dawn ding un a te’na dim lêt in la piai.

⁶ Nang in ka hianghei mite simmaw dingin lei siam in; ka mêlmateu in ei nuisan ui.

⁷ Aw sepai honte Pathian, ei tung ding kit in; hukhin ah ka umtheina ding un, la mêl hung vâk ta hen!

⁸ Aigupta gam ah kipat in grepgui la hun ladok in; nam dangte deldok in, amau chu la phu ta’n.

⁹ Amau â dingin mun la siam piak ah, thûk tak ah zung kai in, gam pumpi chu a lua dim tau hi.

¹⁰ A lîm in tângte a lia in, a bâkte chun sidar thing phung, lian takte chu a jam khum in;

¹¹ a bâkte chu tuisuagiat tiang in a jam hen, a jik selte chule Luipi Lian tiang in a jam hi.

¹² Zia lam haw tapo chun, a ga a law ziang thei ding un, bang ding ah a dâite chu la phiat a hem?

¹³ Gammâng ah sangal in a philsia’n, lou ah ta zosia chun a ne tau hi.

¹⁴ Aw, sepai honte Pathian, hung kihei kit ta’n; van ah kipat in hun en suk inla, zia grep gui hi hun kantha ta’n;

¹⁵ la changlam khut ah a kungpi la phusa ahi ngal a.

¹⁶ Mêlmate’n mei in a hâl un, a phûk tau hi; amau chu la mêl ah la vauna ziakin, hi’mangthai hitau hen.

¹⁷ La changlam ah umpa chung in la khut um hen la, nang â ding ah la hihâtpa ngei chu.

¹⁸ Tichun, hun nusia kit ta pua’ng kau; hinna ei pia’n la, la min hun ko zing tâng kau.

¹⁹ Aw sepai honte Pathian, ei tung ding kit in; hukhin ah ka umtheina ding un, la mêl hung vâk ta hen.