SAM 78 - PATHIAN LEKHABU THIANGTHO (BSI)

Pathian Phatna leh Israelte Kipakna Châng Helo Asaph Maskil

¹ Aw ka mite haw, ka hilna hi ngaisak unla; ka kam ah thu pawtte hin la bil uh daw tiam un.

² Tekhinthu’n ka kam kâ’ng ka tin, masanglai thu ki-îmte kha gen ing ka tin;

³ ei suante’n ei la hil uh, I hiatsau leh I het zingteu chu ahi.

⁴ Ziate chu a chateu lak in îm puai tiu in; khang hung um kit dingte kiang ah chun, Lalpa thilbawl lopi leh a hatna, a thilbawl mak takte chu gensawn zel hitiu.

⁵ Jakob kiang in thuthung a phudet a, Israel lak ah dan a guat in; zia chu I suantuteu kiang in a chateu kiang ah, a hiatsak sawn pek ding un thu a la pia ta’n;

⁶ khangthak hung um dingte’n hia’n tiu in, naupang hung piang nalai dingte chunle, amau chate chiat kiang ah hilsawn jel in au;

⁷ Pathian ah a kingak ua, Pathian thilbawl dante chu hemil mai lo ah, a thupiakte chu a vop zawk ua;

⁸ a suanteu dungsûn ah suan lochal leh, kiphin chîngte, suan thumang lo, Pathian lak ah lungthim ginum lo pu’, a umlo’na ding un.

⁹ Ephraim suante chu a gâlvan thalpiteu chawi in, kido ni chun a jamsiau hi.

¹⁰ Pathian thuthung a vop puau in; a dan dungzui ah um a nial nalai un.

¹¹ A thilbawlte leh a thilmak bawl, etsakte kha le a hemil tau hi.

¹² Aigupta gam sung Zoan phâizawl ah chun, a suanteu mit mu in thilmak takte a la bawlta ngal a.

¹³ Tuisuagiat khên tan in a chia thensak ta’n; tuite chu bangkhat sia khawm gual in a dinsak hi.

¹⁴ Sûn leh sûmpi’n a pui ah, jan khawvak in meipi’n a pui sek hi.

¹⁵ Gamthip ah suangpite a khet hawm piak ah, tuili thûk tak ah kipat gual in, a dawn ding uh tui tam tak a piai.

¹⁶ Suangpi kipat in luicha a luan dawsak in, tuite chu luipi gual in a luan dawsak hi.

¹⁷ Chutisapi’nle a chung ah, thil a hi’khial tei tei nalai un; gamthip ah khan Chungnung pen chung in, a kiphin nalai ui.

¹⁸ A duchâk uh don in a lunggil tak un, Pathian a la patep un.

¹⁹ Pathian dem in thu a gen un, “Gamkeu ah hin Pathian in, ankuang ei lui piak thei diam?

²⁰ Suangpi vaw kêk in, tuite luangdok hen la, luipite luangdok ziang maleh, a mipite nêk dingin an leh sa, a hung umsak thei na diam?” a tiu hi.

²¹ Tichun, Lalpa‘n zia chu a het in a lungna ta’n; Jakob chung in a lungnatna mei a kuangdok a, Israel chung ah lungnatna a hung kuangdok ta’n,

²² Pathian a ginchak lo ziak uh leh a hukdam theina a taksan lo ziak un.

²³ Himaleh, chung lam ah vante khi, van kotkhakte hun hong dingin thu a pia’n;

²⁴ a nêk ding un manna, van an chu a chung un a hun zuksak tai.

²⁵ Mihingte chun vansawlchâkte an chu a ne tau a; kiningting tak in an a hun pia tai.

²⁶ Sualam hui a hânsak ah, a thilhitheina’n simlam hui chu a hun pui tai;

²⁷ leivui jat ah tam a chung un sa a hun kiaksak ah; vacha tha neite chu tuisuagiat piaunêl jat ah tam,

²⁸ a giamun, a chênnau kîmvêl in a kiaksak tai.

²⁹ Tichun, a neu ah, a vâ ma mau a, a duchâk pen uh chu a piak tâk ziakin.

³⁰ A duchâknau a kiduadok ah, a nêk lai ua a val tum mau in,

³¹ Pathian lungnatna a chung un a hung tung ta’n, a lak ua a hat pente chu a that ah; Israel tangval pha pente chu a bêng niam tai.

³² A chutisa’nle a gilo tei tei un; a thilbawl mak takte chule a taksang diak puau hi.

³³ Tichun, a damsung nikhuau chu, kam ah hu kithâdok gual in a hibei piak ta’n, a kumteu chule launa’n a hitawp piak tai.

³⁴ Amau lak ah khenkhat a tha phatin ama a hawl un; a kisik un, gunchu tak in Pathian a hawl ui.

³⁵ Pathian chu a suangpiu ahi ti leh, Chungnung Penpa chu amau Tanpa ahi, ti a hun hedok kit ui.

³⁶ Ahi’n, a kam un a pâkchau ah, a lei un a kiang ah zuau thu a gen ui.

³⁷ A lungthim uh ama chung in a ginum puau a; a thuthung inle a ginum diak puau hi.

³⁸ Ahi’n, ama chu lainatna dim ahi ziakin, a khawlonau chu ngaidam in amau chu a gawt chimit diak puai. A lungnatna a kisûm ah, a hachang thakna zosia chu a choktho nuam puai.

³⁹ Phe leh vo mai a hiu ti leh, huizang hung kit talo ding ah nung gual mai, a hiu ti a hezing hi.

⁴⁰ Gamthip ah khan bang vei jat bep, a chung in a kiphin un, gamkeu ah khan a la hi’lung jing ta bep awm maw!

⁴¹ Pathian chu a vêl vêl ah a la patep in, Israel Mithiangtho a la cho lungna sek ui.

⁴² A thilhitheina a ngaisak puau ah, a mêlmateu lak ah kipat a la hukdaw dante kha le, a ngaisak puau in;

⁴³ Aigupta gam ah a tepte’na etsakte leh, Zoan phâijawl ah a thilmak bawlte kha le, a he ta puau hi.

⁴⁴ A luipiteu thisan a suak sak ah, tichun, a luichateu tuile a dawnthei ta puau hi.

⁴⁵ A lak un thosi hon amau ne zo dingin a la sawl ah; ukêngte le amau hisia dingin a la sawl kha.

⁴⁶ A thâichiteu le lung kiang in a pia’n, a khut nasep gim gateu chule, khaubepite kiang in a piai.

⁴⁷ A grep gui teu chu gial in a sep sia’n, a theichang kungteu le vûk a chawp siatsak a.

⁴⁸ A bawng honteu gial a se’lup sak a, a gancha honteu le têk a se’lup sak hi.

⁴⁹ A lungnatna nasa tak, siatso’na, thangtawmna leh lungjinna chu tawh, gawt chimit ding vansawlchâk tawh, a chung un a tunsak tai.

⁵⁰ A lungnatna â dingin lampi a bawl piak ah; a hinnau chu thi’na lak ah kipat in a humbit pua’n; a hinnau chu hipi kiang in a pia zaw tai.

⁵¹ Aigupta gam pumpi nau lutîl a that ah, Ham puanbûk ah a hatnau ga masa pente chiat chu, a that tai.

⁵² Ziaphatchun, a mite chu belam gual in a puidok ah, gamthip ah chun gan hon gual in a pui tai.

⁵³ Bit tak in a pui pek ah, bangma a lau puau; himaleh, Tuipi chun a mêlmateu a chup mang tai.

⁵⁴ Chuleh, a changlam khut in a bawlsa, a tâng thiangtho ah chun a pui tung tai.

⁵⁵ A ma-âng un namdangte a nawdok a, a gochan ding un gam a pia ta’n, Israel namte chu a puan In un a chên densak tai.

⁵⁶ Ahi’n, Chungnung pen Pathian chu a patep un, a chung in a hel nalai lai ui. A thuguatte chule a zui nuam diak puau ah,

⁵⁷ kihei mangsan nalai in, a pu leh pateu gual ah, ginum lo tak in a gamta tau ah; thalpi lamzang lo gual in a pêt kawi tau hi.

⁵⁸ A thoimualteu ah chun ama a choklungnau ah; a milim pathian siamteu chun, a thangsiatna a choktho ui.

⁵⁹ Pathian in zia chu a het phat in, a lung a na ma ma ah, Israel chu a pumnol tai.

⁶⁰ Mihingte lak ah a chênna, puan In Shilloh ah um chu, a nusia ta’n;

⁶¹ a thilhitheina chu sal in a hen tânsak ta’n, a lopina chule a mêlmateu khut in a pedok tai.

⁶² A mite chu chemjam kiang in a pedok a, a gochante chung in a lungna tai.

⁶³ A tangvalteu chu mei in a kâng tum a, a nungakteu in kichenna La ding a nei ta puau hi.

⁶⁴ A thiamputeu chemjam in a pûk un, a meithâiteu in a sûn puau hi.

⁶⁵ Ziaphatchun, Lalpa chu, ipmu hung thodok gual leh, gâlhat zukham kikodok gual in a hung thodok hi.

⁶⁶ A mêlmate chu a naw kit ah, kumkhua minsiatna a khuksak tai.

⁶⁷ Joseph puan In chu a nol in, Ephraim nam le a têl ta pua’n;

⁶⁸ Judah nam chu a têl zaw ta’n, a ngainat ma ma Zion tâng ngei chu.

⁶⁹ A mun thiangtho chu van sâng tak gual in a lem in; kumtuang â ding ah a phudetsa leilung gual ahi.

⁷⁰ A suak David chu a têl ah, belam huang ah kipat in a ladok ah;

⁷¹ a mipi Jakobte leh a golua ding Israelte vâk dingin, a belam nokâite chinna lak ah kipat in a puidok hi.

⁷² Lungthim thiangtho ah enkol in, thiam tak in amau a kaibât hi.