SAM 74 - PATHIAN LEKHABU THIANGTHO (BSI)

Nam Pumpi Tawden ah Um Panpi Dotna Asaph Maskil

¹ Aw Pathian, bang ding ah ei pâm pai zing la hem? Bang ding ah la gantatna mun ah la belamte chung ah, la lungnatna so zing a hem?

² La mipi, la gochan ding ah, masang lai ah la tatdawte kha hezing in. La hung ah la chênna, Zion tâng chu hezing in.

³ Kumkhua siatna lak ah chun chia inla; mun thiangtho ah thil um zosia chu, mêlmate’n a hisezo ta’ngal un.

⁴ La mêlmate la mun thiangtho sung in a kiko un; a teptênateu chule a tâkdok ui.

⁵ A sawng chung kotpi kipat in, a thing vathakalte chu heicha’n a tusiau hi.

⁶ Ziazaw chun, hiamkhup leh, sek in a jem kikhuak zosia chu a suitha’u hi.

⁷ La mun thiangtho chu a hâl tum un; la min umna mun chu lei tual tawh kikim in, a hi’buak zo tau hi.

⁸ A lungthim uh chun, “A leng in I thu nuai un koi sik sek hitiu,” a tiu a. Tichun, gam sung ah Pathian hona In zosia chu, a hâl tum zo tau hi.

⁹ I teptênateu I mu zo ta puau a; jawlnei him him a um ta puau in, a sawt ding dan he him himle, I lak un a um ta puai.

¹⁰ Aw Pathian, mêlmate chun, bang chan a hem ei nuisan ding uh? Mêlma chun kumkhua’n la min, hun samsia ding a hiu em?

¹¹ Bang ding ah la khut juk kit la hem? Bang ding ah la khut kiltua ah um nalai la hem?

¹² Himaleh, Pathian chu, masanglai ah kipat ka Lal ahi’n, lei ah hukdamna a siam hi.

¹³ La hatna’n tuisuagiat la khen jak a; tuisuagiat dragonte luchang la khet phel piak a.

¹⁴ Leviathan luchangte chu la khen gawp ah; ama chu gamkeu ah ganhingte nêk dingin la pia’n.

¹⁵ Tuinâk leh luiliante nâk ding la ât-hon piak a; lui luang zing laite chule la ting kang a.

¹⁶ Sûn hi nang â ahi’n, jan hile nang â ahi; nang in thapi leh nisa, a um ding gual chiat un la koi hi.

¹⁷ Leilung gamgite la siam a; nipi leh phalbi la siam hi.

¹⁸ Aw Lalpa, mêlma’n a hun simmawnau leh, pathian ngaisaklote hun gensiatnate hi hezing in.

¹⁹ La vakhu hinna gamsate kiang ah pe kin la; hi’genthei ah um la mite hi kumkhua’n hemil kin.

²⁰ Ka kiang ua la thuthung siam kha hezing inla; lei mun thimnate chu nunsiatna’n a dim zo ta’ngal a.

²¹ Nuaisia ah umte chu mualpho sak kin la; genthei leh chagate chun la min pâk tau hen.

²² Aw Pathian, kipan inla, la min chu vêng bit ta’n; Pathian ngaisaklote’n sun nitum ah, a hun nuisannau hi hezing in.

²³ La gâlte husa hi hemil kin la, la mêlmate husa chu chawl lo in, a chia to zing ngal a.