SAM 72 - PATHIAN LEKHABU THIANGTHO (BSI)

Lengpa Kaibât Ding leh Panpi Ding ah Pauchapna Solomon La

¹ Aw Pathian, lengpa chu la thudikna pia’n la, la dikna chu leng chapa kiang ah pia’n.

² Dikna’n la mite chung ah vaihawm hen la; genthei thuakte chu dik tak in vaihawm piak hen.

³ Mualte chun mipite â ding ah hausakna hun suau hen la, tângte chunle dikna hun sua tau hen.

⁴ Mipite lak ah genthei thuakte chu panpi hen la, tasamte chu hukdok hen la, mi sugentheite chu vang gawtnawi hen.

⁵ La mite chun nisa um sungsia leh, thapi a um laisia, suan zosia tiang in hun ho zing tau hen.

⁶ Lengpa chu hampa ki-âttan chung ah, gawtui kia gual leh, lei hul chung ah gawmal kia gual hita hen.

⁷ Thapi a bei masia, ama damsung in dikna leh, chamna’n a gam lua dim hen.

⁸ Ama’n langkhat lam ah tuisuagiat ah kipat, langkhat lam tuisuagiat tiang leh, Luipi Lian ah kipat kawl kîmvêl tiang in vaihawm hen.

⁹ Ama do-te a kengbul ah hung bokkhup uh hen la, a mêlmate’n a leivui hung liak uh hen.

¹⁰ Tarshish leh thialkâl tin ah lengte chunle, leiman hun chawi uh hen la; Sheba leh Sheba lengte’n le, thilpiak hun chawi tau hen.

¹¹ Leng zosia a ma’n hung khiangkho uh hen la; nam zosia’n a na hung sêm uh hen.

¹² Ama’n mi gentheite, tasamte leh, panpitu neilote’n a ko si’n uh leh, a hukdok ngal a.

¹³ Mi zawngkhâl leh tasamte chu a lainat ah, mi tasamte hinna chu a hukdok sek hi.

¹⁴ A hinnau chu nuaisiana leh, mi nunsiate khut ah kipat in a hukdok ah; a thisan uh chu ama ngai in lûl tak ahi.

¹⁵ Dam sawt hen la, Sheba gam ah sana chu piak hi hen! Ama â dingin pauchap piak zing hi hen la, nitum in maljawlna dot piak in um zing ta hen.

¹⁶ A gam ah bu leh bâl piang hen la, tâng tin buvui in chup hen la; a gate chu Lebanon tâng bang tau hen; Pâmtûl hampa gual in mite chun, nîm dep dup in khawpite chu lua dim tau hen.

¹⁷ A min chu kumtuang ah het zing in um hen la, nisa a um sungsia a minthanna chu um zing hen. Nam zosia ama ah chun maljawl in um uh hen la; nam zosia’n ama chu mi hampha hun tiu hen.

¹⁸ Lalpa, Israel Pathian chu pâk in um hen la, ama bep in thil lamdang a bawl sek hi.

¹⁹ A min lopi tak kumkhua’n pâk in um hen la; khawvel pumpi hi a lopina’n lua dim suak ta hen. Amen! Amen!

²⁰ Jesse chapa, David pauchapnate chu a tawp tai.