SAM 68 - PATHIAN LEKHABU THIANGTHO (BSI)

Pâkna leh Kipak thu Genna David Pâkna La

¹ Pathian hung kipan hen la, a mêlmate chu thejak ta hen; ama hawte a ma-âng in jamsia tau hen.

² Meikhu mût mang ah a um gual in, amau chu mût mang in, khuailu mei in a haitui gual in, mi nunsiate chu Pathian ma’n mangthai tau hen.

³ Mi dikte chu vang Pathian ma ah, lim leh kipak tak in um ta’n au; chungnunna changte gual in lim tau hen.

⁴ Pathian chawihoi in La sau inla, a min pâk in La sau in; van sûm chung ah chia sekpa pâkna La, ngai tak in sau inla, a min chu Lalpa ahi’n, a ma-âng in kipak tau in.

⁵ Pathian, a umna thiangtho ah chêngpa chu, pa neilote pa leh meithâite khawtuapa ahi.

⁶ Pathian in mi thawmhaute chênna ding In a pia’n; suangkul ngâkte chule, vangphatna mun ah um dingin a puidok sek hi; kiphin mangte chu vang gamkeu in a umsak sek hi.

⁷ Aw Pathian, la mite ma’ la hun pui ah, gamkeu la hun hawthen lai ah khan,

⁸ lei hi a kithing dul dul in, vante khin le Pathian ma’n, Sinai Pathian leh, Israelte Pathian ma ah chun gua a zuksak hi.

⁹ Aw Pathian, nang in gua tam tak la zuksak a; la gochan ding a zawnkhâl lai inle la hi’det ta’n;

¹⁰ la mipite chun zia tak ah chun um mun a khual un; aw Pathian, la phatna ziakin, nang in gentheite â dingin mun la siam piak tai.

¹¹ Lalpa‘n thu khau tak in a pia, chanchin pawte chu pawl lian tak a hiu a:

¹² “Lengte leh sepaite chu a jamsia tau.” Inngak numeite chu gal lâk a kihawm un,

¹³ belam huangte ah a la um mai mai leule, vakhu multe chun dangka a chûn un, a thavengte chule sana eng gual in a te set set hi.

¹⁴ Hat Chungnung in zia tak ah lengte chu, a del jak lai ah chun, Zalmon tâng ah chun vûk a zuksak hi.

¹⁵ Aw tâng thupi, Bashan tâng; aw tângsâng, Bashan tâng!

¹⁶ Aw tângsâng takte haw, Pathian in a umna ding ah a tâng doichuam; kumkhua Lalpa chênna ding tâng chu, bang ding ah mitthîp ah en la hiu em?

¹⁷ Pathian kângtalai chu a sîng ah sîng, a sâng ah sâng ah tam ahi; Lalpa chu Sinai tâng ah kipat in, a mun thiangtho in a hung hi.

¹⁸ Tângsâng tak in la kal to ah, sal ah matte chu la pui ah; mihingte lak ah kipat leh, zia tak ah Lalpa Pathian a chênna ziak ah, mi kiphin hâtte natiang ah kipat in, thilpiakte la dong hi.

¹⁹ Lalpa, nisi’n ah ei dom sâng zingpa chu, pâk in um ta hen; Pathian chu I hukhingpau ahi.

²⁰ I Pathian uh hi hukhinna Pathian ahi; thi’na kipat hukhinna chu Lalpa, I Pathian uh â ahi.

²¹ Ahi’n, Pathian in a mêlmate luchang, a gitlonau lampi sêlna sambuk lêt lût te, luchang chu sat phel in a.

²² Lalpa‘n, “Bashan gam ah kipat puidok ing ka tin, tuisuagiat thûk tak ah kipat chun pui kit ing ka,

²³ la keng in la mêlmate thisan la pal a, la uichate chunle la mêlmate lak ah kipat, chan a neitheina ding un,” a tia.

²⁴ Aw Pathian, gâl zo ah la lamjawt laite chu a muu ah, ka Pathian, ka Lalpen uh mun thiangtho ah, a lamjawt laite ngei chu.

²⁵ La sa pawlte’n ma a pui un, a nunung in thilgit tumte, a lai un nungak khuangneu bêngte a um un:

²⁶ “Kikhopnate ah chun Pathian pâk unla, Lalpa, nangma Israelte tuinâk ngei chu la hi!”.

²⁷ A masa pen in Benjamin, a neu pen chu a hung in; a nung ah Judah miliante chu a lawm in; Zebulun leh a milianteu ban ah, Naphtali leh a milianteu.

²⁸ Aw Pathian, la thilhitheina ko khawm inla; aw Pathian, kei uh â ding ah lei bawl piak gual ah khan, la hatna hun latsak in.

²⁹ Jerusalem ah la tempul ziakin, lalte’n thilpiakte hun pawkhawm in au.

³⁰ Pumpêng lak ah gam sahângte chu vau inla; mihing bawngchal hon leh a no hon tam takte tawh; thilpiak lung gulte chu la keng in chuanchil inla; kido thanuam mite zosia chu thejak in.

³¹ Aigupta gam ah kipat in sum-eng hun puau hen la; Ethiopia mite chun a khut uh Pathian lam ah, jak dingin kin-gang tau hen.

³² Lei ah lenggamte haw, Pathian chawihoi in La sau inla; Lalpa choihoina La sa tau in. (Selah)

³³ Aw vante, kumtuang van chung ah chuangpa, a aw chu ngai un! Ama’n hatna dim a aw chu a hun sua tai!

³⁴ Pathian kiang in hatna piau inla, lopina chu Israelte chung in a um a; a hâtna chu van sûmte ah khin a um hi.

³⁵ Pathian, a umna munthiang ah umpa chu a tizat um in, Israel Pathian ngei chun, a mipite thilhitheina leh hâtna a piai. Pathian chu pâk in um ta hen!