SAM 66 - PATHIAN LEKHABU THIANGTHO (BSI)

Israelte Chung ah Pathian Phatna Pâkna Pâkna La

¹ Leilung lua zosiate haw, Pathian chawihoi ah lim tak in kiko unla;

² a min lopina chu la’n sau in; lopi tak in choihoina piau in.

³ Pathian kiang ah chun, “La thil bawlte chu a lopi na e! La thilhitheina nasat ziakin, nangma hun do-te le la âng in, hung bokkhup ta’n au.

⁴ Leilung lua zosiate hin chibai hun bûk intiu in; nangma pâkna La sa’n tiu in, la min pâk in La sa’n au,” ti tau hen.

⁵ Hung unla, Pathian thil bawlte hi hung en ma tiam un: mihingte chung ah a thilbawl hi a huaisia ngal a.

⁶ Ama’n tuisuagiat chu lei gawchâk a chansak a; luipi kha keng in a chia theng ui. Zia tak ah chun a chung in I kipak un;

⁷ a thilhitheina chun kumtuang in vai a hawm a; a mit in namtin a en a, kiphin mangte chu a chung in kisuang kiu hen.

⁸ Aw nam zosiate haw, I Pathian uh pâk unla, ama pâkna gi chu hetsak un,

⁹ I hinnau a hingte lak in ei koi nalai a, I kengteu le a tawthol sak puai.

¹⁰ Aw Pathian, nang in lei patep ta’n; dangka haltuina mei ah chet ahi gual in lei chian tai.

¹¹ Nang in lênthâng ah lei pui lût a; ka nungjang un puakgik tak la koi ta’n;

¹² ka luchang uh ka mêlmateu lei chotden sak a; mei leh tui lak in ka chia theng un; hilehle, mun thawveng ah um dingin lei puidok tai.

¹³ Hâlmang thilpiakte tawh la In ah hung lut ing ka tin; la kiang ah ka thutiamte chu mualsua ta’ng ka;

¹⁴ ka lungkham lai ah ka mûk in a la gen daw leh, ka kam in a la tiamsa ngei chu.

¹⁵ Gan thau takte la kiang ah hâlmang thilpiak in, hun pia’ng ka tin, belamchal hâlna gimtui chu tawh; bawgchalte leh kêlchate le hun pia’ng ka. (Selah)

¹⁶ Pathian lau zosiate haw, hung unla, ngai un; tichun, a thil ei bawlpiakte hun hil ing ka.

¹⁷ Ngai tak in ama chu ka ko a, ka lei ah chawihoi in a um tai.

¹⁸ Ka lunggil ah thil phalo ka ngaitua zing chun, Lalpa‘n ei ngaitha pua’n a.

¹⁹ Ahi’n, Pathian in ei ngaitha tak tak hi; ka pauchapna thawmgi chule a ngaisak hi.

²⁰ Pathian, ka pauchapna lawsap sak lo ah, ka kiang ah kipat a ngilneina, lamanglopa chu pâk in um ta hen.