SAM 64 - PATHIAN LEKHABU THIANGTHO (BSI)

Mêlmate Lak ah Kipat Vêng bit Ding ah Pauchapna David Pâkna La

¹ Aw Pathian, ka lungjinna thu ah hin ka aw la hia’n la; mêlma lau um lak ah kipat in ka hinna humbit in.

² Migilote ei tup gûknau lak ah kipat in ei selgu’n la; thil phalo bawlte’n a gûk ah, thil sia ahi guatnau ah kipat chun,

³ chemjam gual in a lei uh a tât hiam un; kam phalo tak takte thalchang gual ah, kâpdok dingin a ngîm un,

⁴ demna umlo mite a chângûknau ah kipat in, a hun kâp un, lau lo in thakhat in a hun kâp sek ui.

⁵ Thil phalo bawl dingin a kitîl hangsan un; a gûk ah thângkam ding dante a gen khawm sek un: “Kuama’n ei mu pua’n a maw?

⁶ I thil guanggal uh hi kuama’n, hethei sam pua’n a maw? Dawhathûk tak ah thilgûk bawl ding I ngaitua tau hi,” a kitiu a. Mihing lungthim leh ngaituana vang a thûk hi.

⁷ Himaleh, Pathian in a thalchang in, amau hun kâp intin; thakhat in liam ta’n au.

⁸ A kam ua thu pawtte ziakin, siatna tuak ta’n au; a siatnau mu tapo chu lau in kithing in au.

⁹ Mi zosia’n hun lau in, Pathian thil hun tunsak thute gensawn in, a thilbawlte chu ngaitua ta’n au.

¹⁰ Midikte chu Lalpa ah chun kipak uh hen la, ama bêl tau hen. Lungthim dik tak pu zosia chun suang tau hen.