SAM 60 - PATHIAN LEKHABU THIANGTHO (BSI)

Guallel Hun ah Nampi Gualzawna Ding ah Pauchapna (Joab a chia kit lam ah Chi Guam ah Edomte sîng khatleh sang ni a thalup ah, ama’n Aram-naharaim tawh Aram-zobah a do lai hun ah kiphuak ahi) David Miktam

¹ Aw Pathian, nang in lei pâm pai ah, ka kulteu lei hisiat piak ta’n; ka chung un la lungna tai; tu’hin vang ei tungding kit ta’n!

² Nang in gam hi la hotlîng in la puai hong ah; a kihaw lumletna kêkte chu la châlmat kit sek hi.

³ La mite hi thil haksa tak tak la thoksak ah, zukham gual ah ka zoithâkna ding un, dawn ding zu lei piai.

⁴ Nangma laute â dingin puanlap la pia hen, thalchang ah kipat a bittheina ding un.

⁵ La doisakte humbit ah a umtheina ding un, la khut changlam in zaw’na ei pia’n la, ei hun dawnhu ta’n.

⁶ Pathian, a mun thiangtho ah a kihaksial ta’n: “Choisa’n ah um in Shekhem khua hawm bei ing ka tin; Sukkoth phâiguam chu hawm jak ing ka.

⁷ Gilead gam chu kei â ahi’n, Manasseh gam le kei â ahi; Ephraim chu ka thîk lukhuk ahi’n, Judah chu ka lal tiang ahi.

⁸ Moab chu ka kisilna kuang ahi’n, Edom chung in ka kengtawdap pai ing ka; Philistin chung ah hân Lâ ka sai,” a tia.

⁹ Khawpi det tak ah chun kua a hem ei pui lût ding? Edom ah chun kua’n ei pui ding a hem?

¹⁰ Aw Pathian, nangma’n lei pâm pai ta hilo a hem? Aw Pathian, ka sepaiteu, la kitonpi nuam ta paw’ngal in.

¹¹ Ka mêlmateu ka do zaw’na ding un ei panpi in; mihing panpi’na hi bangmalo mai ahi ngal a.

¹² Pathian tawh kithua in, hangsan tak in do ing ka tiu in; ama chu I mêlmateu tawden dingpa chu ahi.