SAM 6 - PATHIAN LEKHABU THIANGTHO (BSI)

Damlona Huaisia tak ah Kipat Sukdam Ding ah Dotna David Pâkna La

¹ Aw Lalpa, lungna’n ei vau kin la, la thangtawmna’n ei thunun diak kin.

² Aw Lalpa, ka chung ah ja’ngai in, ka chautha ta’ngal ah; Aw Lalpa, ei hidam in, ka gu zosia lau in a kithing ta’ngal in.

³ Ka hinna nasa tak ah hilungjin in a um ta hilam, Aw Lalpa, bangchan ei ngâk ding la hem?

⁴ Aw Lalpa, hung kihei inla, ka hinna hukhing inla, la ngilneina ziakin ei hukdok ta’n.

⁵ Thi’nung in nangma hetzingna a um pua’n; Sheol ah chun kua’n hun pâk thei ding a hem?

⁶ Ka thûmna ziakin ka gim ta’n; jan si’n in ka mitthi tui in ei chûm a, ka lupna le ka mitthi tui in a chêk suak hial ta ahi.

⁷ Lungkhamna ziakin ka mit a chau tul tul in; ka mêlmate ziakin a chau deu deu ta ahi.

⁸ Nanghaw, thil phalo bawlte haw, ei nusia sik sek tau in; Lalpa‘n ka kâ thawm a he ta’ngal a.

⁹ Lalpa‘n ka dotna a he ta’n; Lalpa‘n ka pauchapna a pom tai.

¹⁰ Ka mêlmate zosia mualpho in lungdong in au; kihei kit intiu in, kin tak ah himualpho hita’n au.