SAM 58 - PATHIAN LEKHABU THIANGTHO (BSI)

Phuba La Ding ah Dotna David La

¹ Pathiante haw, dik tak ah vaihawm la hi nau em? Mi tin chung ah kibang tak ah vaihawm la hi nau em?

² Ahipuai, la lungthim un thil phalo la gêl ui; lei chung ah thagum sua dingin, la khut uh la pan sek ui.

³ Mi nunsiate chu a nu sûl ah kipat him in, Pathian ah kipat pêt mang a la hitau a; a piandawu ah kipat zuau thu gen in, a pêt mang ngal tau hi.

⁴ Gûlgu gual gû a nei un, thangchom bengngong kibeng ngonsak gual in,

⁵ gûl dawithiamte kona leh, a bumte jawlna a hepuau hi.

⁶ Aw Pathian, a kam sung un a hateu chu hi’bal piak inla; Aw Lalpa, sakeibaknei vanglaite uiha chu kheldok ta’n!

⁷ Tui kigêl mang gual in bei uh hen la; hampa gual ah mihing chotden ah um in vuaitha tau hen.

⁸ Chêngkol buanthuak lak ah kisêl mang gual in, mangthai tau hen; a thisa piang, nisa mêl him him mulo gual hitau hen.

⁹ A het masang unle hampa gual ah sât thâk a la hitau ah; a hing zing ahi lai unle, hachangthak tak in, Pathian in phiat mang ding ahi!

¹⁰ Midikte chun phuba lâkna, a mu phât uh leh kipak ta’n au; mi nunsiate thisan ah chun, a keng uh sil ta’n au.

¹¹ Tichun, mite’n, “Midikte â dingin kipakman a um tak tak in; lei ah hin vaihawmtu Pathian a um tak tak hi,” hun ti’n au.