SAM 53 - PATHIAN LEKHABU THIANGTHO (BSI)

Pathian Ngaisaklote Jawnhona David Maskil

¹ Mi ngolte chun a lungthim un, “Pathian a um puai,” a tiu a. A sezo tau ah, thil phalo ki’dak um a bawl tau a, kuama thilpha bawl pakhat chale a um ta puau hi.

² Pil tak ah Pathian hawl him him a um diam uh ti’n, Pathian in van ah kipat in mihing chate a en suk a.

³ Siatna lam ah puimang ah um in, a leng un a kiheimang zo tau hi; kuama thilpha bawl a um puau a, pakhat chale a um ta puau hi.

⁴ Thil phalo bawlte chun hetthiamna neilo ah, vaithum a nêk gual un ka mite a ne zo tau ah, Pathian le ko diak lo a hiu em?

⁵ Zia chun tu’ma lam cheng ah, a launau zosia sâng ah huaisia zaw ah chun, thep lau in um ta’n au. Pathian in ama ngaisak lo zosiate gu chu, thejak ding ahi ngal ah; Pathian in a paithâk tâk ziakin mualpho ta’n au.

⁶ Zion ah kipat Israel hukdawna ding, hung pawt ta mai leh aw! Pathian in a mite vangphatna, a tundin kit phat leh, Jakob lim ta’n tin, Israel kipak ta’n a.