SAM 50 - PATHIAN LEKHABU THIANGTHO (BSI)

Pathian Pomtâk Kithoina Chu Asaph Pâkna La

¹ Hat Chungnung, Lalpa Pathian chun thu a gen a, leilung hi ni sua’na lam ah kipat, a tumna lam tiang in a ko tai.

² Hoina bukim in, Zion ah kipat Pathian in a salvâk tai.

³ I Pathian uh a hung in, thipbek in a um puai; a ma lam in kâkmang mei leh, a kîmvêl ah huipi nasa tak a hâng hi.

⁴ A mite vai a hawm piak theina dingin, chung lam vante leh lei hi a ko ah:

⁵ “Ka mi ginumte, ka kiang ah kithoina bawl ah thuthung siamte kha, hun pui khawm un,” a ti’n.

⁶ Vante khin a dik zia a tâklang un, ama Pathian ngei chu vaihawmpa ahi ngal a.

⁷ “Aw ka mite haw, ngai un, thu gen ding ka hi; Aw Israel, ngai in, la diklona hun hetchiansak ding ka hi. Keima Pathian, la Pathian chu ka hi.

⁸ La kithoinateu ziakin hun zilgai pua’ng ka tin; la hâlmang thillatteu chu ka ma’n a um zing hi.

⁹ La In a’pat bawngchal leh la gancha huang a pat, kêlchate le ka phût diak puai.

¹⁰ Gamlak ah sa chitin hi kei â ahi’n; mual sang khat chung ah gan-gual umte hile, kei â ahi ngal a.

¹¹ Hui lak ah vacha zosia ka he suak in, gam ah ta zosia hile kei â ahi.

¹² Gilkial lengle hun gen pua’ng ka, leilung leh a sung ah um zosia hi kei â ahi ngal a.

¹³ Bawngchalsa ne’n, kêlcha thisan ka dawn ngai em?

¹⁴ Pathian kiang ah kipak thu genna kithoina la’n zaw’n la; la thutiam le Chungnung Penpa kiang in mualsua ta’n.

¹⁵ Lungdon ni’n ei ko lechin, hun hukhing ing ka tin, tichun, nang in ei chawihoi ding la hi!

¹⁶ Mi nunsia kiang ah Pathian in: ‘Bang ding ah ka dan thute la kam ah sua thei ah, ka thuthung la mûk ah gen thei la hem?

¹⁷ Thununna la hua hen, ka thute hi la ngai paw’ngal in.

¹⁸ Gucha la mu leh gualpha’n la siam a; mi thanghuaite la kivoppi zing hi.

¹⁹ La kam chu thil phalo genna’n la mang a, la lei ah zuau gen khawk la sa puai.

²⁰ La chutmun in la chanaute la gensia’n, nangma nu chapa ngei le la gensia sek hi.

²¹ Zia thilte chu la bawl in, ahi’n, ka hun thipsan ah; nangma gual bep hidingin lei ngaitua a. Tu’hin vang hun zilgai in, la thiamlo channa ka hun tâklat piak tai.

²² Nanghaw Pathian hemilte haw, zia hi ngaituau in; ahiloleh, hun bawt tel ah, a hukdok thei ding umlo ah hun bawl mai ding ka hi.

²³ Kuale kipak thu genna kithoina hun lân tapo in ei chawihoi sek un; lam dik zui tapote kiang in, Pathian hukdamna musak ing ka’ ” a tii.