SAM 48 - PATHIAN LEKHABU THIANGTHO (BSI)

Zion Lopina leh Hatna La Korah Chate Pâkna La

¹ I Pathian khawpi Lalpa chu a lopi hen, lopi tak ah chawihoi ding ahi!

² A tâng thiangtho sândan chu a kilawm in, zia chu khawvel pumpi kipakna, Lal lopi tak khawpi Zion tâng chu mallam pek in a um hi.

³ Khawpi kul sung ah chun, Pathian in amau humbit ding ahi dan a hiatsak tai.

⁴ Ziaphatchun, lengte a kikhawm un, a pang khawm tau hi.

⁵ A mu phât un, mak a sau a; a beidon phat un, a tai mang zo tau hi;

⁶ a kithing gawp tau a, numei nauvei gual ah natna’n a man tai;

⁷ sualam hui in Tarshish long liante, a mût siat gual in a um tau.

⁸ Sepai honte Lalpa khawpi ah chun, bil ah ka la het gual un ka mu tau; I Pathian uh khawpi kumtuang â ding ah, Pathian in a phudetsa ngei ah chun.

⁹ Aw Pathian, la tempul sung ah chun, la ngilnei dan thute ka sût tau hi.

¹⁰ Aw Pathian, la min gual ngei in, la pâkna chun kawl kîmvêl tiang a thawng hi. La changlam khut chu gâl zaw’na’n a dim hi.

¹¹ La vaihawmna ziakin Zion tâng chu kipak hen la; Judah gam ah khuate chule kipak tak in um tau hen!

¹² Zion ah chiau inla, a kîmvêl in chiau in; a gâlvên bûk jat chu sim un,

¹³ a kulte chu tepteu inla, a kulpite chu chuan suak un; khangthak hung um kit dingte kiang ah

¹⁴ zia hi I Pathian uh, kumtuang, kuamtuang ah I Pathian uh chu ahi. Ama kumtuang ah ei puipa ding chu ahi, ti la hilsawn theina ding un.