SAM 45 - PATHIAN LEKHABU THIANGTHO (BSI)

Lengpa Ji Neina La Korah Chate La Maskil. Jawl La.

¹ Ka thinlung hi pau mêlpha’na dimlêt hen; lengpa chu la’n ka chawi ta’n; ka lei hi lekhazik thiam tak kawlom gual ahi.

² Mihing chate lak ah mêlpha pen la hi’n, la kam ah chun lungsiatna thu ngen a pawt a; ziaziakchun, Pathian in kumtuang â dingin, mal a hun zawl tai.

³ Aw mihat, chemjam la kawng ah vop inla, la lopina leh la ja’umna’n kithuam in.

⁴ Gual zo ah ja’um tak in hung inla, la khut changlam in thu tak leh, dikna la thilbawl tizat um takte hun hil ta hen.

⁵ Lengpa mêlmate lungchang â dingin, la thalchangte chu a hiam in; mipite la nuai in a pûk tau hi.

⁶ Aw Pathian, la lalchutpha chu kumtuang, kumtuang in a um hi. La lal tiang chule dangdâk diak, neilona lal tiang ahi hen;

⁷ dik tatna la ngaina’n, nunsiatna chu la huai. Ziaziakchun, Pathian, la Pathian chun la gualte khêl lam in, nasa tak in limna sathau a hun nu’ ta ahi;

⁸ la sil leh chênte chu murra leh, aloe gimte leh kassia gimtuite a nam veng vung hi. Saiha ah kisa lal In ah kipat, tingtang git hung pawtte chun a hun hilim a;

⁹ la numei ja’umte lak ah chun, lal chanute le a pang un; la changlam ah chun Ophir sana ah kijem, lengnu a ding hi.

¹⁰ Aw ka chanu, la bil hun daw in ngai inla, ngaitua tiam in, la mite leh la pa In lam kha hemil ta’n,

¹¹ tichun, lengpa’n la mêlpha tak hi, hun dawi ding ahi. Ama la Lalpa ahi ziakin, chibai bûk in;

¹² Tura mite’n la doisakna hawl in, thilpiak chawi in hung intiu in; nam tinte go thil zosia tawh, hausakna chitin hun choi piak in au.

¹³ Leng chanu chu sana ah chei, sil leh chên ah thuam ahi’n;

¹⁴ puanjem hoi tak tawh lal kiang ah pui lût in, a gual nungakte’n a hun zui ui.

¹⁵ Kipak tak leh lim tak in a pui un, lengpa In ah chun a pui lût tau hi.

¹⁶ Aw lengpa, la suantute golua dingin, cha pawsalte hun nei in la tin; amau chu lei chung zosia ah chun, leng in siam inla.

¹⁷ La min chu suan zosia’n, a pâkchât ding un siam ing ka tin; ziaziakchun, mi zosia’n la min, kumtuang in chawihoi in au.