SAM 40 - PATHIAN LEKHABU THIANGTHO (BSI)

Hukdaw Ziak ah Kipak thu Genna leh Panpi Dotna David Pâkna La

¹ Lalpa chu ka ngâk ham ham ah, keima lam hun nga’n, ka ko’na a he tai.

² Manthaina kawkhûk, buanthuak lak ah pat in ei kaidok ta’n, ka keng suangpi chung ah nga’n, ka kalsuante a hi’det tai.

³ Ka kam ah La thak a koi in, I Pathian pâkna La ngei chu. Mi tam tak in zia chu mu’n, lau intiu in, Lalpa ging ta’n au.

⁴ Kisatheite lam leh pathian diklo lam, zuan ah pêtmang lo ah, Lalpa kingakna neite chu mi hampha a hiu.

⁵ Aw Lalpa ka Pathian, nang in thil lamdang la bawlte leh, keimau lam la ngaituanate hi a tam ma ma in; ziate chu la ma’ hilat sên ding gual a hipua’n, hetsak ah gen ding hita leng, sim sên ding gual ahi puai.

⁶ Kithoina leh thillat chung ah, kipakna him la nei pua’n, ahi’n, nakhang pil tak lei pia zaw tai. Hâlmang thilpiak leh, gitlo thoina thilpiak chu lei phût puai.

⁷ Ziaphatchun, keima’n, “Zia hin ka um hi; lekhabu zial sung ah chun ka chanchin zik a la hi.

⁸ Aw ka Pathian, la doigual bawl hi, ka thatnop lam tak ahi’n; la dan chu ka thinlung in a châm zing hi,” ka ti’n.

⁹ Aw Lalpa, mipi kikhopna chun, la hukdawna thupha chu ka gen jak ta’n; ngaitia, ka mûk hin kisûm lo ah, gen ding ahi ti la he ta ngal a.

¹⁰ La hukdawna panpi’na chu, ka thinlung sung hin ka îm pua’n, la ginumna leh la hukdamna thu ka tângkopi zaw ahi; la ngilneina leh la ginumna chu, mi tampi kikhawmte kiang ah chun ka îm puai.

¹¹ Aw Lalpa, la lainatna gui chu sutan kin la; la ngilneina leh la ginumna chun ei humbit zing ta hen.

¹² Buaina simsên lo chun ei ûm kîmvêl ah; khua ka muthei lo tiang in, ka khawlonate chun ei chup mang tai; ziate chu ka luchang ah samzang sâng inle a tam zawu hen, ka lung a thuai tai.

¹³ Aw Lalpa, lungsiat in ei hukhing in! Aw Lalpa, ei panpi dingin kin-gang ta’n!

¹⁴ Ka hinna lâk ding gua ei hawlte chu, mualpho leh zakcha tak in um uh hen la, ka siatna ding doite zosia chu kile’kit in, zakcha tau hen.

¹⁵ Chei, chei ei tite chu a mualpho ziak un, zakcha tau hen.

¹⁶ Himaleh, nang hawl zosia chu, la chung ah lim leh kipak in um tau hen; la hukhinna ngaina taphot chun, “Lalpa chu a lopi na e!” ti’n gen zing tau hen.

¹⁷ Kei vang, genthei leh chaga ka hi, ahi’n, Lalpa‘n ei ngaitua piak zing hi. Nang chu ei panpipa leh ei hukdokpa la hi. Aw ka Pathian, hung muangchâng kin.