SAM 38 - PATHIAN LEKHABU THIANGTHO (BSI)

Gitlo Kisik Natna Sukdam Ding ah Dotna (Het zingna thilpiak lat hun ah sak ding) David Pâkna La

¹ Aw Lalpa, lungna’n ei vau kin la, hachang thak in ei thunun diak kin.

² La thalchangte chu ka taksa ah hin kâp lut a hita’n; ka chung in la khut la tha ta’ngal a.

³ La lungdamlona ziakin ka taksa ah hin dam lai ni him a um pua’n; ka gitlona ziakin ka gute hin, hisêl lai him a nei diak puai.

⁴ Ka mantheilona hin ka puak zaw gual lo, puak gik gual in, ka lujang a del ket kût hi.

⁵ Ka ngolna ziak ah ka liamna bête hi a ui in, nâi a khuat zo tai.

⁶ Nasa tak ah betniam in ka um ta’n, lei tual in ka kipha mât hial tai; nitum in ka kap tawl tawl hi.

⁷ Ka kawngte hile a sa hut hut ah, ka sa chung ah hin damna him a um puai.

⁸ Ka chautha ta’n ka tawp tai; ka ngaituana buai ziakin ka thûm hut hut hi.

⁹ Aw Lalpa, ka duthusam zosia la hia’i, ka thûmna hi nangma ah kipat, sêlgûk in a um puai.

¹⁰ Ka lungchang a phu dûp dûp ah, ka hatna a chautha ta’n; ka mit vakna le a jawngkhal tai.

¹¹ Ka gualte leh ka Invêngte’n, ka nat thokgim ziakin ei jamsan tau in, ka chanaute nasan inle, gamla tak in ei jamsan tau hi.

¹² Ka hinna hawlte’n ka awkna dingin, thâng a kam un; ka siatna ding hawlte chunle, thu phalo ngen gen in, nitum tum in ka siatna ding, a ngaitua sek ui.

¹³ Ahi’n, bengngong gual in bangma ka hepua’n, pau theilo gual in bangma ka gen puai.

¹⁴ Ahi, bangma helo gual leh, a kam ah zilgaina pawt kha lo gual in ka um hi.

¹⁵ Himaleh, aw Lalpa, nangma la hi ka thangai; Aw Lalpa, ka Pathian ei dawnhu ding chu nang la hi.

¹⁶ “Ka mêlmate ka chung in kipaksak kin la; ka pûkna chung in kisuang diak kiu hen,” ti’n ka don ngal a.

¹⁷ Ka pûk vang vang in, ka natna’n le ei nusia ngai puai.

¹⁸ Ka khawlona chu ka puang in, ka gitlona khawk ka sa ma ma hi.

¹⁹ A ziak bei ah ei do-te chu a hat un, diklo tak ah ei mudate chu a tam ui.

²⁰ Phatna, siatna ei thuk kit sekte hi, thilpha ka zui ziak ah ei do-te a hiu.

²¹ Aw Lalpa, ei nusia kin! Aw ka Pathian, ei gamlat kin.

²² Aw Lalpa ka hukdamna, ei panpi dingin kin-gang in.