SAM 33 - PATHIAN LEKHABU THIANGTHO (BSI)

Pathian Lopina leh Phatna David Pâkna La

¹ Aw mi diktatte haw, Lalpa ah chun kipak tau in. Midik â dingin Pathian pâk hi a kilawm him ahi.

² Tingtang in Lalpa chu pâk unla, pêkgit gui sawm nei chite mang ah, gi hoi tak in ama chawihoi tau in.

³ Ama pâk in La thak sau inla, thiam tak leh ngai tak in tum un.

⁴ Lalpa thu chu a dik in, a thilbawl zosia chule ginum tak ah bawl zaw ahi.

⁵ Dikna leh vaihawmna dik a ngaina hen; leilung hi Lalpa phatna’n a dim hi.

⁶ Lalpa thu’n vante khi siam ahi’n, zia um zosia chu a kam ah suak a hu ah siam a hiu.

⁷ Ama’n tuisuagiat ah tuite chu, likli sung ah um gual in a koikhawm ah; tui thûk takte chu a khol khawm sek hi.

⁸ Lei chung lua zosiate chun Lalpa lau uh hen la; khawvel ah um zosia’n ama tiza tau hen.

⁹ Ama’n a gen ah a hung um ta’n; ama’n thu a pia’n a hung um det ngal tai.

¹⁰ Lalpa‘n nam tin lunggel chu bangmalo a chansak ah; mi tin thil guanggal chu bangmalo a suaksak sek hi.

¹¹ Lalpa lemguatna chu kumtuang in um den intin, a lungthim ah a ngaituanate chu, suan zosia tiang in um zing in a.

¹² Lalpa chu Pathian ah nei nam chu mi hampha a hiu; ama go ding ah têlte ngei chu.

¹³ Lalpa‘n van ah kipat khin a hun en suk a; mihing zosia a mu suak hi.

¹⁴ A lalna chutpha ah kipat in, lei ah chêng zosia tawidan mu dingin a en zing a,

¹⁵ a leng ua lungthim siam piak ah, a thilbawl dan zosiau en zui zingpa ngei chun.

¹⁶ Lal hi a sepai hon tam ziak bep ah hukdaw a hipua’n; mi hat hile a thahât ziak bep ah hukdaw ahi diak puau hi.

¹⁷ Gâl zaw’na ding ah sakol bep ah, kinep hile bangmalo mai ahi’n; a hatnau mai in kuama a hukdok diak puau hi.

¹⁸ Lalpa mit chu ama kichate chung in a chu sek ah, a ngilneina’ ki-ngate leh,

¹⁹ a hinnau thi’na lak ah hukhing ding leh, kial hun ah le amau vêng bit ding ah, kinemte chung ngei ah chun.

²⁰ I hinnau hin Lalpa a ngâk zing ah; ama chu ei panpipa leh I phawu ahi.

²¹ Ama ah chun I lungthim uh a lim hi, a min thiangtho I gin ziak un.

²² Aw Lalpa, nangma ah ka kinepna dungzui un, la ngilneina chu ka chung un um zing ta hen.