SAM 30 - PATHIAN LEKHABU THIANGTHO (BSI)

Damlona Huaisia ah Kipat Damkitna Ziak ah Kipak thu Genna (Tempul Lat Hun ah Pâkna La) David La

¹ Aw Lalpa, nang in lei choisa’n ziak leh, ei do-te ka chung ah la kipaksak lo ziak hin, hun chawisâng ing ka.

² Aw Lalpa ka Pathian, lei panpi don in ka hun ko ah, nang in lei hi’dam tai.

³ Aw Lalpa, nang in ka hinna, Sheol ah kipat in la hukdok ta’n, mithi khua chiasukte lak ah kipat in, ka hinna la tungding kit ta ahi.

⁴ Aw a mi ginumte haw, Lalpa chawihoi in La sau inla, a min thiangtho chu pâk tau in.

⁵ A lungnatna chu hun chomkhat bep dai ahi’n; a doisakna chu vang damsung dai ahi. Kâ-na chu a jan giak mai thei, ahi’n, jingkal ah chun kipakna a hung tung ngal sek hi.

⁶ Ke’n vang ka hinkhua nop lai ni hin, “Bangmatik in kilîng pua’ng ka,” ka ti’n.

⁷ Aw Lalpa, la doisakna ziakin, tâng det tak gual in lei phu det tai; la mai lei sêl mangsan leh, ka bei a dong sek hi.

⁸ Aw Lalpa, nangma ka hun ko ah, ka Lalpa, nangma kiang ngei ah ka hun dot kha:

⁹ “Ka thi chu nang â ding ah bang phachuam ah, gawtmun kawkhûk thim sung ah lut leng, nang â ding ah bang thil phachuam um ding a hem? Leivui chun nang hun chawihoi thei ah, la ginumna chu puangjak thei ding a hia hem?

¹⁰ Aw Lalpa, ngaitha’n la, ei lungsiat in! Aw Lalpa, ei panpipa hung hita’n!”.

¹¹ Ka pûldona chu lim ah lâmna la chansak ta’n, ka saidip puan sil ei lipthâk piak in, kipakna’n lei thuam ta ahi;

¹² tichun, ka hinna hi thip hiat hiat lo ah, nangma a hun pâktheina dingin. Aw Lalpa ka Pathian, la chung ah kumtuang in kipak zing ta’ng ka.