SAM 28 - PATHIAN LEKHABU THIANGTHO (BSI)Panpi ding Dotna leh Panpi’na Ziak ah Kipak thu Genna David La 1 Aw Lalpa, ka suangpi, ka hun ko hi: ka lam ah la beng hi’ngong kin; lei ngaisak loleh vang mithi khua lûtsukte gual in um kha’ng ka. 2 Ka khutte la mun thiangtho pen lam ah hun jak ah, la panpi’na ngai ah ka hung pauchap phat leh, ka dotna ei la ngaithâk piak ta’n. 3 Migilo leh thil phalo bawlte lak ah chun, thiamlo ei chan khawmsak kin la; amau chun a Invêngteu kiang in, kichamna thu gen sek maleu, a lungthim uh chun thil phalo ngen a ngaitua ngal un. 4 A thilbawl uh tawh kigûn leh, a thilbawlteu phatlo dungzui leh, a khut nasep dungzui un din inla, a gitlo man uh musak in. 5 Lalpa nasepte leh a khut thilbawlte, a limsak lo ziak un; tundin kit tâk lo dingin, khen chim den ta’n a. 6 Lungsiat ah ka dotna aw te a ngaithâk ziakin, Lalpa chu pâk in um ta hen! 7 Lalpa chu ka hatna leh ka phaw ahi’n; ka lungthim in ama chu ka muang ngam ah; tichun, panpi in ka um ta’n, ka lungthimle nasa tak in a kipak ta’n, keima’n La sa’n ama pâk ing ka. 8 Lalpa chu a mite â dingin a hatnau ahi’n; a sathaunu’ â ding ah hukhinna kulpi ahi. 9 Aw, la mite hukhing inla, la gochan chu maljawl ta’n; amau haw ching inla, kumkhua’n kaitua ta’n. |
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
Bible Society of India