SAM 27 - PATHIAN LEKHABU THIANGTHO (BSI)

Pathian Muangte Gual Zaw’na La David La

¹ Lalpa chu ka vâk leh ei hukhingpa ahi’n; kua a hem ka lau ding? Lalpa chu ka bitna kulpi ahi; kua a hem ka lau ding?

² Thil phalo bawl ah ei do, ka mêlmate’n ka sa nêk gua ei soisak lai un, kisui in, kipuk in au.

³ Ei do-te sepai hon in ei hual vêl ziang maleu, ka lungthim lau pua’n a; do leh gâlte lian maleu, kimuang tak in um zing ing ka.

⁴ Lalpa kiang in thil pakhat ka don ah, zia bep chu hawl zing ing ka: Ka damsung sia Lalpa In ah um zing ah, Lalpa mêlphat zia mu ding leh, a tempul ah a thu dong ah um zing dingin.

⁵ Lungdon ni chun a bitna mun ah ei sêlgu ding ahi’n, a humbitna puanbûk ah chun ei sêlgu’n tin, suangpi chung sâng takah ei lângkai ding ahi.

⁶ Tu’hin, ka mêlma ei ûm kîmvêlte chung lam pekah, ka luchang dawp kang in a um tai; ahi’n, a puanbûk ah chun limna La ngai tak ah sa pum in, kithoinate chu lân ing ka; Lalpa pâk ah La sa’n, thilgi hoite tum ing ka.

⁷ Aw Lalpa, ngai tak ah ka hun ko phat leh, ei la ngaitha’n; lungsiat in ei dawnhu in.

⁸ Ka lunggil in, “Hung inla ka mêl hung hawl in!” a ti’n. “Lalpa, la mêl ahi ka hawl,” ka ti’n.

⁹ Ka mu lo dingin la mêl sêlgu kin la, lungna’n la suak hi ei sawl mang ziang kin la; nang chu ei panpipa la la hi’ngal a. Ei panpi kin inla, ei nusia him him kin! Aw Pathian, ka kihukhinna la hi’ngal a.

¹⁰ Ka nu leh ka pa’n ei nusia ta ziangleu le, Lalpa chun vang ei khawtua zing in a.

¹¹ Aw Lalpa, la lampite ei hil inla, ka mêlmate ziak ah hin lamphei ah ei pui in.

¹² Ei do-te khut ah a duthusam gual un ei pedok kin la, hiatpitu diklote ei do in a hung ding tau ah; amau chun nunsiat thu bep a sêkdok ui.

¹³ Ka hin sung in hinna gam ah, Lalpa phatna mu ding ka kinem hi.

¹⁴ Lalpa chu ngâk zing in; kisuhat inla, la lungthim chu kihânsak ta hen; ahi, Lalpa chu ngâk zing in!