SAM 18 - PATHIAN LEKHABU THIANGTHO (BSI)

Galzawna Ziak ah Lengpa Kipak thu Genna ( Lalpa ‘n a suak David a mêlmate zosia leh Saul khut ah kipat a hukdaw ziak ah a gen)

¹ Aw, ka hâtna Lalpa, ka hun ngai hi.

² Lalpa chu ka suangpi, ka kulpi det leh ei hukdokpa ahi; ka Pathian, ka kisêlna suangpi, ka phaw leh ka hukdamna kî leh ka kulpi ahi.

³ Pâk tâk Lalpa chu ko ing ka tin, tichun, ei do-te lakah kipat hukdam in um ing ka.

⁴ Thi’na khauhualte chun ei zem a; manthaina tuisânglêtte chun ei tawk ta’n;

⁵ Sheol khauhualte chun ei zem châk a; thi’na thângte chun ei dâl tai.

⁶ Ka lungjin in Lalpa ka ko ah: ei panpi dingin ka Pathian ka ko hi. A tempul ah kipat in ei la ngaitha’n, ka kona aw a he tai.

⁷ Ziaphatchun, lei hi a kilîng in a kihot dup dup tai; a lungnat ziakin tângte chule, a kingakna pum in a kilok in, a puakjak tai.

⁸ A nâk hawm ah meikhu a pawt in, a kam ah kipat meikuang nasa tak a pawt in; ama ah kipat meiâm nasa tak le a kuangdok hi.

⁹ Ama’n vante kûnsak in, a hung kum suk ta’n; a keng nuai ah chun thimna sâ tak a um hi.

¹⁰ Cherub khat chung ah chuang in a leng mang tai; hui thâte mang in kin tak in a hung tai.

¹¹ Thimpi hi a lalchutpha tuamna’n a mang a, sûmpi sâ tak ah thim leh tui haw hi, a lalchutpha liana’n a mang in, tui haw hi bûkcha’n a mang hi.

¹² A ma âng ah vak nasa tak ah kipat in, a sûmpite chu hun sepvang suk in; gialte leh suangmeihol kuang a hung ketha zung zung hi.

¹³ Lalpa chule vante ah khin a thûm zung zung a, Chungnung Penpa chun a aw a sua tai.

¹⁴ A thalchangte a kâpdok ah, a mêlmate chu a thejak tai; kawlte a phêtsak zawl zawl ah, amau chu a subuai veng vung tai.

¹⁵ Ziaphatchun, aw Lalpa, la zilgaina leh la nâk hawm ah hu pawt ah la mût ziakin, tuipi luannate a hung kilang in; leilung kingaknate le a hung kilangdok tai.

¹⁶ Chung lam ah kipat in ei hun bân suk in, ei hun tu ta’n; tui hat takte lak ah kipat in ei kaidok tai.

¹⁷ Ka mêlma hât tak lak ah kipat leh, ei do-te lakah kipat ei hukdok tai; amau chu kei tawh kilang ding ah hat talua a hiziak un.

¹⁸ Ka vangsiat lai in ei dodâl sek un; himaleh, Lalpa chu ei panpipa ahi.

¹⁹ Ama’n mun awngthawl takah ei puidok a; ka chung ah a lungkim ziakin ei hukdok tai.

²⁰ Lalpa‘n ka dikna dungzui in kipakman ei pia’n; ka khutte a thiantho dungzui in ei din kit hi.

²¹ Lalpa lampite chu ka haw ta’n, ka Pathian ah kipat nunsia tak in ka pêtmang kha puai.

²² A vaihawmna zosia ka âng in a um sik sek in, a thuguatte chule ka koimang ngai puai.

²³ A âng ah demna bei ka hi’n, diklona lak ah kipat in ka kikoi kâng sek hi.

²⁴ Ziaziakchun, Lalpa‘n ka dikna dungzui leh, a mit mu ah ka khutte a thiantho dungzui in, ei la dit ta ahi.

²⁵ Mi ginumte kiang ah chun la ginumna la tâklang sek a; demna beite kiang ah chun demna bei la hi’na la sulang sek in;

²⁶ mithiangtho kiang ah chun thiangtho in la kilang in; mi lungkawi kiang ah chun nunkhawk tak in la kilang sek hi.

²⁷ Nang in mi kingainiamte la hukdok sek in, mi kingaisângte vang chu la bêng niam sek hi.

²⁸ Ka thaumei ei detpiak chu nangma la hi; Lalpa ka Pathian in keima ah thimna ei hi’vâk piak tai.

²⁹ Nangma jal in sepai hon ka nuaichimit ta’n; nang ka Pathian jal ma in bâng ka chopkhûp zo hi.

³⁰ Zia Pathian hi a lampi a pha bukim in; Lalpa thutiam chu a dik suak hi; ama bêl zosia â dingin phaw ahi.

³¹ Lalpa tilo ngal Pathian dang kua a hem um? I Pathian uh tilo ngal Suangpi kua a hem um?

³² Hâtna ka tâi ei gâk piak leh, ka lampi bit tak ah siampa Pathian ngei chu.

³³ Ama’n ka kengte hi sazuk keng gual in ei siam piak ah, mun sâng ah bit tak in ei umsak hi.

³⁴ Ka khutbânte hi gal do dan a zilsak ah, tichun, ka khutbânte hi, sum-eng thalpi lawinem zo ding khop in, ei siam piak tai.

³⁵ Nang in la hukhinna phaw lei pia ta’n, chuleh, la changlam khut ah ei panpi in, lei siam lian tai.

³⁶ Ka nuai ah ka kalsuannate â dingin, mun awngthawl tak lei siam piak ta’n; tichun, ka keng a teu ngai puai.

³⁷ Ka mêlmate ka del ah, ka delpha tai; sukchimit ahi masiau in ka nusia puai.

³⁸ Thodok kit talo dingin ka vawpai ta ngal in, ka keng nuai in a pûkden tau hi.

³⁹ Nang in kidona dingin, hatna kawnggâk lei gâksak ta’ngal a; ka mêlmate lei nuaisia sak tai.

⁴⁰ Ka mêlmate lei tai mangsan sak in, ei mudate ka gawt mangthai tai.

⁴¹ Panpitu ding a ko un, himaleh, a hukdok ding kuama a um puai; Lalpa a ko un, ahi’n, a dawnhu ta puai.

⁴² Hui in leivui a mût mang gual in ka khenbuang in; lam lai buanthuak gual in ka paidok tai.

⁴³ Nang in mite kidelna lakah lei hukdok a; namtinte luchang dingin lei siam ta’n; ka het ngailo mite chun ka na a sêm tau hi.

⁴⁴ Ei het phat uh leh ka thu a ngai un; gamdang mite chu ka kiang ah kitulut dingin a hung tau hi.

⁴⁵ Gamdang mite chu a lungthuai zo tau a, lau leh kithing kawm in, a kulpiteu ah kipat in a hung pawtdok tau hi.

⁴⁶ Lalpa chu a hing zing hi! Ka Suangpi chu pâk in um hen la; ka hukdamna Pathian chu chawihoi in um hen la,

⁴⁷ phuba ei lâkpiak ah, mite ka nuai ah ei zawsakpa Pathian ngei chun,

⁴⁸ ei do-te lak ah kipat in ei hukdok ta’n; ahi, nang in ka mêlmate chung ah ei domkâng in, thagum suate lak ah kipat in lei hukhing tai.

⁴⁹ Ziaziakchun, aw Lalpa, namtin lak ah la min chawihoi ing ka tin; la min pâk in La sâng ka.

⁵⁰ A lengpa kiang in gual zaw’na nasa tak chu a pia hen; a sathaunu’, David leh a suante chung ah chun, kumtuang in a ngilnei dan a latsak tai.