SAM 17 - PATHIAN LEKHABU THIANGTHO (BSI)

A Hi’gentheite Ah Kipat Hukdok Ding Ah Pauchapna David Pauchapna

¹ Aw Lalpa, thudik ka dotna ngai inla, ka kiko’na aw hi ngai in; zuauthepna pang lo mûkah kipat ka pauchapna hin la nakhang daw in.

² Nangma ah kipat in ka dik zia hung kilang hen la; la mit in dikna chu mu hen.

³ Ka lungthim enchian in, jan in ei kantha’n, ei patep malechin, keima ah hin nunsiatna him mu pua’n la; ka kam inle a genkhial puai.

⁴ Midangte thilbawl ahileh vâng chu, la kam ah thu pawt dungzui in, thagum sua’na lampite chu ka pêl hi.

⁵ Ka kalsuante hin la kalbite chu a chuan det ah; ka kengte hin a chuanteu ngai puai.

⁶ Aw Pathian, ka hun ko hi, nang in ei dawnhu ding la hiziak in; ka lam ah la nakhang daw inla, ka thugen a la ngai in.

⁷ Lamdang tak in la ngilneina det dan hi’lang inla, aw, nangma bêlte hukdok ah, a mêlmateu ah kipat a khut changlam ah hukdok sekpa.

⁸ Mit naucha gual in ei vêngpha’n, la thalîm nuai ah ei sêlgu’n la,

⁹ mi nunsia ei chomnâm gawte leh, ka mêlma ei ûm kîmvêlte lak ah kipat hin.

¹⁰ A lungthim un lainatna a nei puau; a kam un kihisak tak in thu a gen sek ui.

¹¹ Ei zui suk pek un, tu’hin vang ei ûm kîmvêl tau in; lei tual ah ei se’pai theina ding un, a mitteu chu ka chung in a chu tai.

¹² Amau chu sakeibaknei sa pet tel nuam ma ma leh, sakeibaknei vânglai, mi chânggu’ munthip ah bok zing gual chu a hiu.

¹³ Aw Lalpa, hung kipan in, amau chu kituakpi’n la, nuaisia in! Ka hinna mi nunsia lakah kipat in, la chemjam chun hukdok inla,

¹⁴ aw Lalpa, la khut in mihingte lak ah kipat ei hukhing in, amau dam sung chanvo chu, zia khawvel ah bep hin a um ngal a. Amau â ding ah la kholpiakte zosia’n, a gilpiu hidim inla, a chateu in a mamaw sâng ua tam zaw nei uh hen la; a chasenteu â ding tiang in, bang a hem khat bêk thi’san uh hen.

¹⁵ Ke’n vang, dikna’n la mêl en ing ka tin; nangma kibatpina nei ah ka hung dindaw phat leh, ka lung kim ta’n a.