SAM 150 - PATHIAN LEKHABU THIANGTHO (BSI)Pathian Lopina A Chungnun Ziak ah Pâkna 1 Lalpa chu pâk un! A mun thiangtho ah chun Pathian pâk unla, a hâtna van awng lian tak ah chun pâk tau in! 2 A thilbawl lopi takte ziakin pâk unla, a lopina nasat dungzui in pâk tau in! 3 Pengkul gi tawh ama pâk unla, lilu tawh pekkhuang in pâk tau in! 4 Khuangneu tawh lâm kawm in pâk unla, tumgit leh mût git theite mang in pâk tau in! 5 Vaikhutbet git tawh pâk unla, Vai khutbet git ngai tak tawh pâk tau in! 6 Bangkim a hathei taphot in Lalpa pâk uh hen! Lalpa chu pâk tau in! |
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
Bible Society of India