SAM 148 - PATHIAN LEKHABU THIANGTHO (BSI)

Pathian Lopina’n Khawvel A Lua suak Ziak ah Pâkna

¹ Lalpa chu pâk un! Van ah kipat khin Lalpa chu pâk unla; chung lam ah te khin ama chu pâk tau in!

² A vansawlchâk zosia’n ama chu pâk unla; a sepai zosia’n le ama pâk un!

³ Ni leh tha te haw, ama chu pâk unla; aksi vâk zosia’n le ama chu pâk un!

⁴ Nanghaw van sâng pente haw, ama chu pâk unla; vante chung ah tuite chunle pâk un!

⁵ Ziate haw chun Lalpa min chu pâk tau hen; ama thupiak ah siam ah hung um ahi ngal un.

⁶ Ama’n ziate chu kumtuang ah um dingin a hi’det a, hi’danglam thei tâk lo dingin a thu chu a hidet ta’i.

⁷ Lei ah kipat hin Lalpa chu pâk un! Nanghaw tui lak ah ganhing lian leh, tuili thûk takte haw,

⁸ mei leh gial, vûk kia leh jan dâichîm zosia, thigawpi a thupiak dungzui ah umte haw!

⁹ Tângte leh mual zosia, thingga chi leh sidar thing zosiate haw!

¹⁰ Gam sate leh ganchate zosia, a bok ah vâk leh chung ah leng zosiate haw!

¹¹ Lei ah lengte leh mipi zosiate haw, lei ah leng chapate leh vaihawm zosiate haw!

¹² Nungakte leh tangvalte, têksete leh khanglaite haw!

¹³ Zia haw chun Lalpa min chu pâk chiat tau hen! ama min bep choisa’n ahi hen, a lopina chun lei leh vante a khûp talua ahi.

¹⁴ A mite a chawisâng ta’n, a mi ginum zosia’n pâk uh hen la, Israel mipite, ama doichuam mite ngei chun. Lalpa chu pâk tau in!