SAM 145 - PATHIAN LEKHABU THIANGTHO (BSI)

Pathian Lopi Dan leh Phatna Pâkna David La

¹ Ka Pathian leh lengpa, nangma hun chawisâng in, la min kumtuang in pâk ing ka.

² Nisi’n in hun pâk ing ka tin, la min kumtuang, kumtuang in chawihoi ing ka.

³ Lalpa chu a lopi hen, lopi tak ah pâk ding ahi; a lopi dan chu suidaw sên ding gual ahi puai.

⁴ La thilbawlte chu khangthak zosia’n, gen sawn intiu in, la thilbawl nasa takte chu gensawn jel hi’n a.

⁵ La lal zia lopina minthang tak leh, la thilmak bawl lopi takte chu sût ing ka.

⁶ La thilbawl tizat um takte chu puanjak pek hi’ntin, ke’n le la lopi dan chu puangjak ing ka.

⁷ La phatna chu lawm intiu in, la dikna thu ngai tak in la’n sa’n au.

⁸ Lalpa chu mi lungsiat thiam, lainatna dim leh lungnem, ngilneina buting nei ahi.

⁹ Mitin â dingin Lalpa chu a pha’n, a thilsiam zosia chu a lainat hi.

¹⁰ Aw Lalpa, la thilbawl zosiate’n, la kiang ah kipak thu gen uh hen la, la mi ginum zosia’n hun pâkcha tau hen.

¹¹ La lenggam lopi dan thute gen uh hen la, la thilhitheina thu chun holim tau hen;

¹² mihing chate zosia kiang ah, la thilbawl lopi takte leh, la gam hoina lopi zia hetsak uh hen.

¹³ La lenggam chu kumtuang lenggam ahi’n, la thuneina chun suan zosia tiang dai in ah. Lalpa chu a thugen zosia’n a ginum in, a thilbawl zosia ah lainatna nei ahi.

¹⁴ Lalpa‘n kipûk zosia a kaitho hen, ngûi zosia a phawng hal kit sek hi.

¹⁵ Mi tin in a hun en un, tichun, a hun tak in a an ding uh la pia’i.

¹⁶ La khut la jak a, hinna nei zosia la kipaksak sik sek hi.

¹⁷ Lalpa chu a tawidan zosia’n a dik a, a thilbawl zosia ah mi lungsiat thei tak ahi.

¹⁸ Lalpa‘n thutak ah ama kote chu a nai sek in, thutak ah ama ko tapote chu.

¹⁹ Ama laute lungtup chu a lawtin sek in; a kiko thawm uh hia’n a hukdok sek hi.

²⁰ Lalpa‘n ama hepi taphot chu a vêngtup zing in, mi nunsia zosia vang hi’mang in a.

²¹ Ka kam in Lalpa pâkna thu gen intin, hinna nei zosia’n a min thiangtho chu kumtuang, kumtuang in pâk in au.