SAM 144 - PATHIAN LEKHABU THIANGTHO (BSI)

Nam Pumpi Hukdawna Ding leh Bitna Ding ah Puchapna David La

¹ Lalpa ka hâtna suangpi chu pâk in um ta hen, ama’n ka khutte gâl kâp dan leh, ka khutzungte kido dan ei zilsak a;

² ka suangpi leh ka kulpi, ka kiselna det leh ei hukhingpa, ka phaw leh ka kisêlna, mite ei nuaisiasak sekpa chu ahi.

³ Aw Lalpa, mihing hi bang a hia ngaisak zing la hem? Thi thei mihingte hi bang ding ah la ngaitua zing sek?

⁴ Hatkhat gual mai a hiu; a damsung nikhuaule lîm bei pai sek gual mai ahi

⁵ Aw Lalpa, la vante kûnsak inla, hung suk in; tângte chu sukha’n, tichun, mei khudok hen.

⁶ Kawl phetsak inla, thejak in; la thalchangte kapdok inla, hi’mangthai in.

⁷ Chung sâng ah kipat in la khut in hun bân suk inla, tui hat tak lak leh gam dang mite khut ah kipat in, ei thâdok in, ei hukdok in;

⁸ a kam un zuau a gen un, chuleh, a khut changlam uh a dik paw’ngal a.

⁹ Aw Pathian, nangma choihoina La thak hun sâng ka; tingtang gui sawm nei mang in, nangma pâkna La hun sa’ng ka,

¹⁰ lalte kiang ah gualzawna pepa, a suak David hukdokpa chu la hi.

¹¹ Chemjam hiam tak ah kipat leh, mêl hetlote khut ah kipat leh, a kam uh zuautheina dim leh, a khut changlam lepchiate lak ah kipat in ei hukdok in.

¹² Ka chapateu chu a khangdawng lai un, thingno khan pha tak gual in um uh hen la; ka chanuteu chu leng Insakna ding ah khuam kijem, hoi tak gual hung hitau hen.

¹³ Ka bu Inteu chule ga chitin ah sundim in um hen la, ka belamteu le a sâng têl, a sîng têl in ka huang un pung uh hen la;

¹⁴ ka bawng unle no tampi pi nei uh hen. Kulpi bâng sukvanna leh sal ah puimangna um ki’hen la, ka kotzing unle lungkhamna thawm um ki’hen.

¹⁵ Zia gual vangphatna dong namte chu mi nuamsa a hiu; Lalpa, Pathian ah nei mite chu mi nuamsa a hiu.