SAM 143 - PATHIAN LEKHABU THIANGTHO (BSI)

Mêlmate Lak ah Hukdok Ding ah Puchapna David Pâkna La (2 Sa 17,18)

¹ Aw Lalpa, ka pauchapna ngai inla, la ginumna leh la dikna ziakin, lungsiat ka dotna ei ngaithâk piak inla, ei dawnhu in.

² La suak chung thu vaihawm nai kin la, la mit mu ah hin mihing thiamchang ding, a um paw’ngal un.

³ Mêlma’n ei delzing in, ka hinna tual khetna’n a mang in, tuan ah tâng ah thi tasate gual in, thim nuai ah ei chutsak tai.

⁴ Ziaziakchun, ka thagau ka sung in, a basam den ta’n; ka thinlung ka sung hin a lungjing den tai.

⁵ Nidang lai hunte kha ka hezing ah, la thilbawl zosia ka ngaitua in, la khut nasepte ka sût sek hi.

⁶ Ka khut nangma lam ah ka hun jak in, ka hinna gamkeu gual in, nangma ngâi in a dangchâk hi.

⁷ Aw Lalpa, ei dawnhu kin in; ka thagau basam ding ahi tai. La mai ei sêl mangsan kin la, achutiloleh, mithi khua, lûtsukte gual mai in um kha’ng ka.

⁸ Jingkal in la ngilneina det thu ei hetsak in, nang ka hun ging ngal a. Ka chiana ding lampi ei hil in, ka lungthim in nangma lam ka hun nga ngal a.

⁹ Aw Lalpa, ei do-te lak ah kipat ei hukdok inla; nangma ah kisêlgu dingin ka hun bêl hi.

¹⁰ La doilam bawl dingin ei zilsak in, ka Pathian a la hi’ngal a. La thagau pha tak chun lamphei ah ei pui hen.

¹¹ Aw Lalpa, la min ziakin ka hinna vêngbit in. La dikna ziakin ka hinna, lungjinna lak ah kipat in puidok in.

¹² La ngilneina ziakin ei do-te chu sumangthai inla, ka mêlmate zosia sumangthai in, la suak ka hi’ngal a.