SAM 142 - PATHIAN LEKHABU THIANGTHO (BSI)

Hi’gentheite Lak ah Hukdok Ding ah Pauchapna (Kawlhawm ah a kisêl laiah a pauchapna) David Maskil

¹ Ka aw’n Lalpa chu ka ko ah, ka aw’n Lalpa kiang ah lungsiatna ka don ah.

² A ma-âng in ka buaina ka tut in, a ma-âng in ka lungjinna thu ka hetsak hi.

³ Ka thagau ka sung ah a basap lai in, nang in ka lampi la hezing a. Ka chiana lampi ah chun, ka awkna ding thâng a kam guu a.

⁴ Ka changlam en inla, ngaitia: kuama ei limsak a um puau in; ka kisêlna dingle a um ta puai; kuama’n ei khawtua puau hi.

⁵ Aw Lalpa, nangma ka hun ko a, “Nangma ka kihumbitna leh hin leh damna gam ah, ka chanvo la hi,” ka ti hen.

⁶ Ka kiko thawm hi ngaikhawk in, nasa tak ah betniam in ka um ta’ngal a. Ei engbawlte lak ah kipat ei hukdok in, kei â dingin a hât talua ngal un.

⁷ La min ka hun pâktheina dingin, suangkul ah kipat in ei ladok in. Mi dikte’n ei ûm kîmvêl ta’n tiu in, ka chung ah la phatna nasa tak ziakin.