SAM 140 - PATHIAN LEKHABU THIANGTHO (BSI)

Mêlmate Lak ah Hukdok Ding ah Pauchapna David Pâkna La

¹ Aw Lalpa, thil phalo bawlte lak ah, kipat in ei hukhing inla, mi khawksakna beite lak in ei vêng bit in;

² thil phalo ngen a suangtua sek un, kidona a chokdok sek ui.

³ Gûl gual in a lei uh a tât hiam un, a lei nuai uh chun thangchom gû a koi sek ui.

⁴ Aw Lalpa, migilote khut ah kipat in ei vêngpha’n la; ka kiakthâkna ding guanggal, mi nunsiate lak ah kipat in ei vêng zing in.

⁵ Mi kiletsakte chun ka awkna ding thâng a kam un, lênthâng khauhualte a jak un, lamdung in ka awkna ding thâng a kam ui.

⁶ Lalpa kiang ah chun, “Nang ka Pathian la hi, aw Lalpa, lungsiat in ka dotna ngaitha’n,” ka ti hen.

⁷ Aw Lalpa, ka Lalpa, ei hukhingpa hat, kido hun in ka luchang la liakhu tai.

⁸ Aw Lalpa, mi nunsiate duthusam chu pe kin la; a ngaituanau phalo chule pitin sak diak kin.

⁹ Ei ûm kîmvêlte chun a luchang uh ei dawsân khum un; a mûk zuauthei uh chu a chung un kile’kit ta hen!

¹⁰ Mei âmte a chung un chu hen la! Tho’kit talo dingin, kawkhûk thûk tak ah ke’lut tau hen!

¹¹ Mi gensiat hâtte chu lei ah hin phudet kin la; thagum suang mite chu siatna’n kin tak in hawldok ta hen!

¹² Lalpa‘n tasamte panpi in, chagate chu dik tak in vai a hawm piak hi ti ka hia’i.

¹³ Matheilo in midikte chun la min pâk intiu in; mi lamzangte chu la kiang ah chêng den ta’n au.