SAM 110 - PATHIAN LEKHABU THIANGTHO (BSI)

Pathian In a Thiampu-Lengpa Chu Gâl Zawsak Ding ah Muan Ngamna David Pâkna La

¹ Lalpa‘n ka Lalpa kiang ah chun: “La mêlmate la keng ngakna ding ah, ka hun bawl piak masia, ka changlam hin kichu zing in,” a ti’n.

² Lalpa‘n la hatna lal tiang chu, Zion ah kipat in sawldok intin; la mêlmate lak ah vaihawm ta’n.

³ La tâng thiangtho ah la sepaite ma la hun pui phat leh, la mipite chu nang â ding ah, thanuam tak in hung kipia’n tiu in; jingkal matak ah daichîm gual in, la khanglaite chu la kiang in hung in au.

⁴ Lalpa‘n thu a tiam ta’n, a lungthim theng kit ta pua’n a; “Nang vang Melkisedek gual ah, Kumtuang thiampu chu la hi,” ti in.

⁵ La changlam khut in Lalpa a um hi, a lungnatna ni phat leh lalte chu satbong lem lum in a.

⁶ Namtin lak ah vaihawm intin, kidona phual chu mithiluang ah hi’dim in, lei chung zosia lengte luchang chu tan piak in a.

⁷ Lampi dung ah luicha tui dawn in, kihihat in, a lu dom sâng in a.