SAM 108 - PATHIAN LEKHABU THIANGTHO (BSI)

Gâl Zaw’na Ziak ah Pauchapna leh Pâkna La David Pâkna La

¹ Ka thinlung hi a det hi, aw ka Pathian, ka thinlung hi a det hi; La sâng ka tin, gi hoi lem ing ka. Ka hinna, hung thodok in!

² Aw pekkhuang leh tingtang, hung tho un! Kei chu phalvak ah tho ding ka hi.

³ Aw Lalpa, namtin lak ah la kiang in, kipak thu hun gen ing ka tin, namtin lak ah nangma pâk in La sâng ka.

⁴ La ngilneina vante sâng in a sangzaw hen, la ginumna’n van sûmpite a khûp hi.

⁵ Aw Pathian, vante chung lam pek ah choisa’n in um in la, la lopina chu lei chung zosia ah chawihoi in um ta hen.

⁶ La hepite hukdok ah a umtheina ding un, ei dawnhu inla, la changlam khut in zaw’na hun pia ta’n.

⁷ A mun thiangtho ah Pathian in, “Mai ân tak ah gual zo in Shekhem hawm jak ing ka tin, Sukkoth phâiguam chu khentha’ng ka.

⁸ Gilead gam kei â ahi’n, Manasseh le kei â ahi; Ephraim chu ka thîk lukhuk ahi’n, Judah chu ka lal tiang ahi.

⁹ Moab chu ka kisilna kuang ahi’n, Edom chung in ka kengtawdap paitha’ng ka tin; Philistin gam chung in hânlâ sâng ka,” a ti hen.

¹⁰ Kua ‘hem khawpi kulbâng nei ah ei pui lût ding? Kua ‘hem Edom gam ah ei pui lût ding?

¹¹ Aw Pathian, nang in lei pâmpai ta hilo maw? Aw Pathian, ka sepaiteu la kitonpi ta puai.

¹² Aw ei do-te dopi dingin ei hung panpi in, mihingte panpi’na vang bangmalo mai ahi ngal a.

¹³ Pathian panpi’na jal in hangsan tak in do ing ka tiu in; ama chu ei do-te ei tawden piak dingpa chu ahi ngal a.